Sorkar department hrang hrang inthlunkhawmna Inter Media Publicity Coordination Committee chuan May thla thupui atan Zuk leh hmuam do, “Say no to Tobacco” a thlang.

Meeting hi Aizawl, AIR Station Conference Hall-ah IMPCC Core Committee Chairman, Dy. Director (Engineering) Pu D.R. Lalropuia kaihhruaiin vawiin chawhnu dar 1:00 khan neih a ni a, tun thla thupui “Kangmei laka inven dan” tih chu media hrang hrangin mipui hriat tura an puanzar that thu an sawi a ni.

Thla leh hi Mizoram sorkar chuan vaihlo leh a kaihhnawih do thlaa a puan avangin, zuk leh hmuam a bikin, vaihlo in mihring taksa a natna a thlen hrang hrang laka mipui an fihlim theih nan te, mi meizuk khu atanga a zu ve lo te pawhin natna an vei dan te inzirtir a, Mizo mipuite hriselna a lo that zawk theih nan, vaihlo do tura uar zawka inzirtir nise an ti a ni.

Vawiin meeting ah hian Mizoram State Tobacco Control Society Nodal officer Dr. Jane Ralte chuan Mizoram mipui zaa 67 vel vaihlo leh a kaihhnawih laka an fihlim loh thu leh he dinhmun chhe tak laka mipuite khaichhuak turin an pawl chuan theihtawp a chhuah mek tih a sawi a, vaihlo khapna dan hrang hrang hmangin vaihlo do beihpui an thlak tan October 2008 atanga kumin March 2012 thlenga Mizoram pumah dan bawhchhia 3295 an man tawh a, heng ang mi mante pawisa chawi tlingkhawm hi Rs. 95,239 a tling a ni.

Hei bakah hian vaihlo zial, sahdah, tuibur leh cigarette kawra meizuk hlauhawmzia hrilhhriatna thuziak intarlo, 1182 an man tawh bawk.

Vawiin meeting ah hian, department hrang hrang, PIB, Field Publicity, Directorate of Health Services, Agriculture, Soil & Water Conservation, AH & Vety, AIR leh DDK Aizawl hmalakna te thlirlet a ni a, Mizoram sorkar department hnuaia NLUP bawhzui dan te chipchiar zawka tarlan a ni bawk a ni.