Vawiin chawhnu dar 1:00 khan Serchhip DC Conference Hall-ah Serchhip ICDS Project hnuaia NFBS beneficiary mi 21 hnenah tanpuina pek an ni a, District Bawrhsap Pu P.Lalchhuanga, Chairman Selection Committee on NSAP Serchhip District ni bawk chuan he hun hi hmanpuiin tanpuina hi a sem nghal a ni.

District Bawrhsap chuan Sawrkar Laipuiin mipuite hamthatna, a bik takin BPL chhungkuate a ngaihpawimawhzia sawiin, mipuite nitin mamawh (basic needs) phuhruk sak hi a tum ber anih thu leh hemi atana ruahmanna chi hrang hrang a siam zinga pakhat National Family Benefit Scheme anihna ang taka chhawr tangkai a ni chu lawmawm a tih thu a sawi a, Sawrkar Laipuiin miretheite tanpuina turin ruahmanna chi hrang hrang engemaw zat a siam a, mipuiten hengte hi kan hriatchian tawk loh avangin a dawng awm ngawih ngawih ten dil nachang an hre thin lova, heng scheme hrang hrangte hi mipuiten an hriatchiana an chhawr tangkai theih ngei nan Sawrkar department, Media te leh NGO te tangruala mipuite zirtir tura theihtawp chhuah a tul a tih thu a sawi bawk.

Vawiina sem tak National Family Benefit Scheme hi Sawrkar Laipui in National Social Assistance Programme a kalpui mek hnuaia Scheme hrang hrang panga zing a pakhat a ni a, he scheme in a tum ber chu BPL chhungkaw zinga eizawng tu ber (breadwinner) kum 18-64 inkar a upa ni bawk a boral palh a a kalsan tak a chhungte tanpuina tur atana tih a ni a, Serchhip ICDS Project hnuaiah hian chhungkaw 21 thlang tura tih niin heng chhungkua thlanchhuahte hnenah hian tangka fai Rs. 10,000/- theuh vawiin khan hlan an ni a, heng chhungkaw thlanchhuahte hi Serchhip atang chhungkaw 6, Thenzawl atang chhungkaw 3, New Serchhip, Chhiahtlang, Chhingchhip, Keitum leh Bungtlang atangin chhungkaw 2 theuh, Buangpui leh Thinglian atang chhungkaw 1 ve ve te an ni.

Vawiin tanpuina sem inkhawm hi Pu Lalbiakliana, Circle Officer (ICDS) in a kaihruai a, YMA leh VC aiawhten an telpui bakah thuthar lakhawmtuten an telpui bawk a, National Social Assistance Programme chungchang a zawhna hrang hrang leh hrilhfiah ngaite sawihona hun an hmang nghal bawk a ni.