Vawiin khan Aizawl North III Cluster tan Industries department chuan NLUP tanpuina 2nd installment a pe chhuak ve leh ta a. Chanmari YMA Hall-ah Parliamentary Secretary to Chief Minister Pu Lal Thanzara’n Local Council aiawhte hnenah a hlan a ni.

Vawiina NLUP 2nd installment semah hian Industries department hnuaia trade 18 thlangtu mi 352 hnenah tanpuina hi sem a ni a. Zarkawt atangin chhungkaw 17, Hunthar - 63, Electric Veng - 90, Edenthar-29, Chanmari-50 leh Chanmari West atangin chhungkaw 103 hnenah a vaiin Rs.184,67,200/- sem chhuah a ni.

Pu Lal Thanzara chuan Mizoram UT hun lai atanga tun thlengin sorkarna chelhtu political party zawng zawng ten ei leh bara ram intodelhna tur leh mirethei te khai chhuahna tur programme an nei vek a. P.C party chuan kum 6 ro an rel chhungin Garden Colony an kalpui a, MNF sorkar hmasa chuan Jhum Control an kalpui hnuah kum 10 chhung MIP an kalpui leh a, Congress party chuan term hmasa zawka NLUP a kalpui hnu ah tun tumah hian NLUP changtlung zawk a kalpui leh ta a. Garden colony te Jhum control leh MIP te hi hlawhtlin pui sawi tur an awm loh laiin NLUP hmasa zawk hnuaiah loneih, thlai huan leh ranvulh a mi hlawhtling thahnem tak an awm a ni, a ti a. NLUP hmanga mirethei te hnenah nuai 1 aia tlemlo tanpuina pek chu tu sorkar leh tu state mahin an la tih ngai loh a ni tih sawiin Industries department hnuaiah ringawt pawh NLUP thawh khatna ah hian Aizawl khawpui chhung ah 2nd installment sum vaibelchhe 18.46 a luang lut dawn a. Heti zozai sum sem tur lo awm theihna chhan hi mipui ten ngun taka chhutin a ngaihtuah chhuaktu Mizoram sorkar leh a petu central sorkar te, malsawmna thlentu Pathian hnenah lawmthu sawi kan ba tak meuh va ni, a ti a. NLUP chu ram hnuk khawih a nih avangin a hlawhtlin ngei theih nan te, a hlawhtlinna atanga Kohhran ah pawh thawhlawm te a lo pun deuh deuh theih nan a dawngtu te leh mipui ten tih tak zeta Pathian auh leh a ti hlawhtling tura beih hi kan mawhphurhna a ni, a ti.

Eiruk dona kawngah RTI Act hmanga PRISM te zawhna chhanna atangin Chief Minister Pu Lal Thanhawla chu a thutiamah a rintlak a ni, tiin Pu Lal Thanzara chuan eiruk leh hlemhletna a inhnamhnawih officer thenkhat te chu ban an ni a, a then suspend leh chhui mek an ni, a ti a. PWD hnuaia kawng chhia tih pawh theihtawp chhuah mek a nih thu sawiin Pu Lal Thanzara chuan kawngpui te chu a enkawltu hmasa BRTF ten kum 10 chhung an maintain tawh loh ang angin PWD in a chhawm a, theih tawp chhuaha chei that mek a ni a, hmarchhak state dang te nena khaikhin chuan Mizoram kawngpui te chu a tha tawh zawk hle a ni, a ti bawk.

Vawiina NLUP semah hian trade thenkhat, a bungruaa sem ngaite hmaih rih a nih laiin Desktop Publishing te erawh chuan sum dawn tur nuai khat hi a vaiin an dawng nghal a. NLUP Implementing Board Chairman Pu R.Selthuama’n inkhawm hi a kaihruai a. Aizawl District Level Monitoring Chairman Lt.Col.Z.S.Zuala’n NLUP dawngtute fuihna thu a sawi bawk a ni.