Nimin tlai khan Higher &Technical Education Minister Pu Lalsawta chuan College of Teachers Education, Republic Veng a tlawh.

CTE Principal Pi Varparhi Khiangte, Staffs leh zirlai ten Minister hi tha taka lo dawngsawngin a pualin inkhawm tawite an buatsaih a. Zirlaite leh zirtirtute lam atangin an mamawhte, harsatna an tawh te leh College hmasawnna tur thil tul nia an hriat te Minister hnenah hian zalen taka thlenna hun hawnsak an ni a. Transportation leh zirtirtu pension a chhuak te post la hnawhkhah loh avanga harsatna an tawh te Minister hnenah hian an thlen a ni.

Pu Lalsawta chuan a taka an dinhmun hriatpui leh hmuhpui a duh avanga CTE hi tlawh a ni tih a sawi a. Mizorama zirna belhchian dawl leh tha zirlai ten an neih theihna tur kalphung thar leh kawng hrang hranga sorkar tan lak dan te tarlangin chumi kengkawh tur chuan zirtirtute an pawimawh em em a ni, a ti a. An College a thil tha an zirchhuah te chu anmahni thawhna sikulah danglamna thlen thei khawpa tangkaia hmang tura fuihin an tello chuan an sikul chu a famkim lova, sikul tha a ni lovang tih thinlung pu a thahnemngai taka an thiamna te hmang chhunzawm turin zirtirtu Training nei lai mekte a fuih a. Zirna chu Mizo mipui ten hlawhtlinna kawng kan hriat bel ber, mi ram leh mi hnam te laka kan chhuan ve theih a ni a, chuvangin Mizo naupang ten zirna tha ber an neih theih dan tur hi sorkarin a ngaipawimawh em em a ni, a ti a. Zirna in tha mawi tak neih aiin zirna kalphung tha sorkarin a ngaihpawimawh zawk thu sawiin Mizo zirlai tam takin mu tan bera an neih Mathematics zir dan kalphung thlak pawh tha a an hriat thu Minister hian a tarlang a. Pawl 9 zirlai chin te chu Group A leh B a then a, zirna sang zawk an beih huna Subject an thlan duh dan tur zul zui a Maths har deuh emaw awl sam zawk deuh emaw thlan dan tur an ngaihtuah thu leh a tul a nih chuan he kalphung thar hi an lakluh tur thu Minister hian a tarlang nghal bawk

1975 a din College of Teachers Education hi Mizoram College te zinga result nei tha ber pawl niin Academic Year hnuhnung berah pass percentage 93% an nei a. Tunah hian IASE, MEd leh Phd thlenga zir theihna tur dinhmuna hlan kai tum mek a ni a. Mizoram University Education Department nena tang hovin MEd Course of study pawh peihfel a ni tawh a. MEd zirna hawng tura MZU affiliation hmu tur hian National Council for Teachers Education, Bhubaneshwar atangin Inspection Team in an endik a, an pawm phawt a tul avangin nghah mek an ni a. NCTE lamin harsatna an tawh avanga he Team in Mizoram an lo thlen theih mai loh avang hian MEd zirna hi hawn theih a la ni rih lo a ni.