Vawiin chawhma khan Govt. Aizawl West College (GAWC) chuan Freshers’ Social 2017, Vanapa Hall-ah an hmang a. Higher & Technical Education Minister Pu R. Romawia chu Khuallian a ni. 

Pu R. Romawia chuan  “Zirna hmanga thiamna hi assets siamna ropui ber a ni”, tiin kan hnam la naupang hle mahse hma kan sawn nasa a ni ,a ti a. Zirtirtute hlutzia sawiin  zirlai kalkhawmte chu a eng zawnga thil  thlir thiam turin leh rilru puitling taka hma lam pan turin a chah a. Khuallian chuan Govt. Aizawl West College-in hmasawna, zirlai mai bakah college infrastructure lama an thang zel chu lawmawm a tih thu a sawi a. Zirlaite hnenah chuan undergraduate level maia tawp lova  zir sang zel turin a chah a, hei hian kan ram thanna kawngah pawh a tha zawngin a nghawng dawn a ni, a ti a. Pu R. Romawia chuan hriattur leh zirtur chu zir sang apiangin an hriat belh thu sawiin, chumi finna nei tur chuan zirlaite chu a fuih a. College chauh ti hmingthatu nilova khawtlang leh ram tana chhawrtlak ni turin duhsakna a hlan nghal bawk a ni. 

Govt. Aizawl West College hi May Ni 2, 1990 khan din niin tun dinhmunah hian zirlai 886 an awm a. Zirtirtu (Teaching Staff) 38 awmin thawktu dang (Non- Teaching staff) 15 an awm mek a. April 2017 khan National Assessment and Accreditation Council (NAAC) chuan college hi endikin B+ Grade an pe a ni. 

Govt. Aizawl West College Principal, Dr. P. Lalremliana chuan kalkhawmte lawmna thu sawiin General Secretary (SU) V. Lalnuntluanga atangin report ngaihthlak a ni a. Vice President (SU) Jf Lalhmangaiha chuan lawmthu sawina in hun a khar a ni.