Vawiin chawhma dar 11 khan Agriculture Conference Hall Serchhipah Serchhip District-a Oil Palm chingtute inhmuhkhawmna hun ‘Oil Palm Growers Meet 2017’ hman a ni a, Pu J. Lalzamliana, MAS, Director of Agriculture (CH) chuan khuallian niin a hmanpui.

Khuallian chuan, kan ramah Oil Palm a tha duh tih kan in sawi hmuh a, mi tam takin Oil Palm an ching a, a rah pawh kan seng tan mek a ni. Chutih rual chuan Oil palm hi a chingtuten Sekibuhchhuak a ni lova, theihtawp chhuaha thawha a hlawkna seng chauh tur a ni tih hi hria se ka duh a ni a ti. Loneitute hnenah tanpuina sum tam tak sem chhuah a ni tawh a, a taka thawh chhuah leh a rah seng tum rilru pu lem lova tanpuina sum ringawt buaipui an awm thin hi thil pawi tak a ni, hetiang rilru put hi loneituten kan kalsan a tul hle a ni a ti bawk.

Loneitute hnenah hian Cultivation Cost hlan nghal in Hectare khat zela Rs. 4000 zela semin vawiina loneitute kalkhawmte hnena a hlan zawng zawng hi Rs. Nuai 10.1547 (nuai sawm sing khat sangnga zali leh sawmnga pasarih) a ni.

He hunah hian Serchhip District-a Oil Palm chingtute enkawltu 3F Oil Palm Agrotech Pvt. Ltd. aiawhin Pu Lalremngheta pawhin thu sawina hun a hmanga. Kum 10 vel liam ta atang khan Serchhip District ah Oil Palm tiak sem chhuah tan niin vawiin thlenga sem chhuah tawh zat chu nuai 3.7757 (nuai thum sing sarih za sarih sawmnga pasarih) a nih thu a sawi a, kum 2016 atang khan loneitute Oil Palm thar chhuah pawh an lei sak thin thu a sawi bawk.

He hun hi Pu James Lalsiamliana, MAS, District Agriculture Officer, Serchhip chuan a kaihruaia, District chhung hmun hrang hranga Oil Palm chingtu mi 132 kal khawmin, Oil Palm enkawl dante leh a hralhna chungchanga hma lak dan turte sawi hona hun hman a ni bawk a ni.