Khawpui tihhmasawnna tura SIPMIU hmalakna hrang hrang chungchang chanchinbu thenkhatah a lo lang a, SIPMIU hmalak chhoh dan te mipuiin an hriatfiah theih nan hetiang hian UD & PA (SIPMIU) chuan thuchhuah an siam a ni.
Kawng laih chhiat siam that thu ah hian fur khat nghah hi duhthusam ber niin hei hi kawngpui enkawltu Public Works Department (PWD) lam duh dan pawh a ni a. Pipe phum tawh hnua lei vur leh (backfill) hi amah a tlak muk (natural compaction) nghah thin hian a hnu a tlahniam tur nasa takin a veng a. Amaherawhchu, veng thenkhatah hi chuan vengchhung mipuite ngenna avang leh chhan dang (duh chen chen road block a neih theih lohna leh sik leh sa etc.) avangin siamthat vat a tul thin a. Duhthusam ang taka thawh a duhawm rual hian Road Block kan neih theih hun chhung te leh kawng siam vat lohin mipui a harsatna tam tak a thlen thin avangin rang taka kawng siam that nghal hi a tul fo thin a ni
SIPMIU hna reng reng hi mipui te ta (public utility) a nih avang leh SIPMIU hnuaia - Khawpui tih changtlunna tur project hrang hrangte hi a neitu leh hmangtu tur mipui zirtir thiamna leh thawh hona tel lo a hlawhtling thei lo deuh hlir a ni hlawm a. Hemi avang hian mipui zirtir leh hrilh hriatna lamah pawh nasa takin SIPMIU hian hma a la thin a.
SIPMIU hian veng hrang hrangah hna thar a tan dawn reng reng hian mipui hrilh hriatna leh rawnna (Public Consultation Meeting) a huaihawt thin a, hemi hunah hian vengchhung mipuite sawmin, hmun remchangah hnathawh dan tur chungchang inhrilhfiahna leh sawihona hun hman thin a ni. SIPMIU lam atangin Engineer in powerpoint presentation leh hmanraw dang hmangin hna kalpui dan tur mipuite an hrilhhre thin a, hemi hnu hian zawhna awm ang ang te chhan thin a ni. Hemi hnu hian Line Department hrang hrang leh local Council te nen joint visit neiin hna tan dan tur hi ruahhman thin a ni.
A tirah chuan heng Public Consultation Meeting ah hian mi nawlpui sawm thin an ni a, amaherawhchu, kum eng emaw zat SIPMIU hmalakna kalpui a nih tawh hnuah hi chuan mipui ten thil kalphung an hrethiam deuh tawh a hriain veng hruaitute (Local Council leh NGOs) te nen ruahhmanna siam thin a ni ta a n. Hemi chung hian Vengchhung au rinna hmanga tlangau turin Local Council te hi ngen thin an ni a, hna thawh hunchhung leh motor tlan dan tur te leh a tul dangte puanzar thin a ni. Tin, vengchhung chanchinbu ah SIPMIU hnathawh chungchang article siamsa chhuah thin tura ngen an ni bawk.
Heng hmalakna bakah hian monsoon season (off-season) chhung hian Aizawl mipuite hnenah SIPMIU hnathawh in hrilhriatna uar lehzuala kalpui dan tur ruahhman mek a ni bawk.
Manhole mai ni lovin thli sawngbawlna (Sewerage Treatment plant) hrim hrim hi kan ram Mizoram ah hian a tum khatna atan a siam a ni a, thil (technology) la hmelhriat loh a nih avang hian mipui nawlpui tan chuan hriatthiam a har khawp awm e.
Hetiang ruahhmanna hi state tam takah hlawhtling taka kalpui lo ni tawh mahse tlangram/Mizoram angah hi chuan a danglam em em a. Ek leh thli in atanga lakhawm tur pawh hian kawng thlang leh kawng chhak lam nei kan nih avangin a buaithlak zual hle a ni. Ek leh thli te hi in atangin pipe hmangin manhole a dawn khawm tur a ni a, chu mi atang chuan pipe lian hmangin a sawngbawlna tur hmuna thlen leh tur a ni a. Hetiang a nih avang hian in engzat nge awm thei a, thli engzat nge awm thei tih te zirchiang hmasain chu mi mila pipe len zawng te, Manhole awmna tur te, a thuk zawng leh a luanna tur hawi zawng te hi duan vek a ni a. Amaherawhchu, kan tui line te, side drain awm dan a zir te leh Telephone hrui kalna avang te hian a hmunah siamrem ngai te pawh a awm thei bawk thin a. Mahse Manhole chhuat level te hi thli luan dan tur mila ruahhman lawk vek an nih avangin duh duh dana sawn kual erawh a rem lova, tin a thlang lam a pipe leh Manhole te siamrem (redesign) tel zel a tul bawk avangin a theih chin chinah ruahhman lawk anga siam hi a him ber a ni.
SIPMIU hian awareness campaign leh public consultation meeting hrang hrang a nei thin a. Solid Waste Resource Management hnuaia dustbin sem rual khan (4th Quarter 2015 atanga 1st Quarter, 2016 chhung pawhin) 83 Local Council area-ah awareness leh consultation mipui nawlpui pungkhawm hnenah neih vek tawh a ni.
Aizawl City Sanitation Task Force hnuaiah hian Action Plan on Source Segregation thehluh tawh niin, pawmfel a ni a, he kalhmang (Action Plan) a hma la turin SIPMIU Aizawl hi ruat a ni. SIPMIU chuan veng tinah Local Sanitation Task Force leh a enkawltu tur Supervisor a ruat a, Local Council area 83 ah kal chhuakin Sanitation Task Force te hnenah hian bawlhhlawh felfai taka thliar dan (Source Segregation) Training pek hmasak an ni a, anni hian an mahni veng theuh a in tinah he inzirtirna hi an pe mek a ni.
Hemi piah lamah hian tunhnai maiah khan Local Council area 83-ah Solid Waste Resource Management project hnuaiah tho hian mipui inhrilhhriatna (Awareness Campaign) leh bawlhhlawh felfai taka thliar dan (Source Segregation) Training neih a ni (November leh December, 2016 chhung khan). Hemi hun chhung hian Local Sanitation Task Force member te leh Supervisor te sawm an ni a, an vain mi 905 ten hun hi an chhim a ni.
Water Supply project hnuaiah hian July 2016 atang khan mipui inhrilhhriatna leh rawnna (Public Consultation) Meeting vawi 14 neih tawh a ni a. Local Council member te leh NGO awm thei te nen hun hman a ni a. Mi 347 an tel tawh a ni.
Sewerage and Sanitation project hnuaiah hian July, 2016 atanga May 2017 thleng khan mipui inhrilhhriatna leh rawnna (Public Consultation) Meeting vawi 11 neih tawh a ni a, project dang ang bawkin Local Council leh NGO awm thei an gang sawm an ni thin. Heng PCM vawi 11 ah hian mi 286 an tel tawh a ni.
