No.2009/2021-2022
Aizawl, the 26th August 2021: High School leh Higher Secondary School Mathematics Zirtirtute tan Online Class kaltlanga zirna kalpui dan ‘Online Training on Educational Technology for Helping Teacher during the COVID-19 Pandemic’ chu nimin(Dt. 25.08.2021) leh niminpiah(Dt. 24.08.2021) zan khan buatsaih a ni.

He Online Training hi Human Resources Development Board kaihhruainain Directorate of School Education, SCERT, Mizoram, Mizoram Information Technology Society (MITS), Mizoram Mathematics Society (MMS) leh Department of Mathematics, Pachhunga University College-te tangrualin an buatsaih a ni.

He Online training zan khatna chu Pi Laldawngliani Chawngthu, Director SCERT- in kaihruai a. Pu L. Thangmawia MLA, Vice Chairman, Human Resources Development Board pawhin he training pawimawh tak hi a telpui a ni. Pu L. Thangmawia chuan zirna tihhmasawn nana Information Technology pawimawhna leh tangkaina sawiin, zirtirtuten Computer leh Smartphone hmanga zirtirna an pek theihna tur kawng kawhhmuh chu he training-in a tum pawimawh tak a nih thu a sawi a. Mathematics zirtirtute-ah bul tan phawta, subject dangah pawh a tul chuan hma lak chhoh zel a nih tur thu a sawi bawk a ni.

Training zan hnihna chu Dr LP Lalduhawma, President, Mizoram Mathematics Society-in kaihruai a. Pu James Lalrinchhana, Director, School Education Department pawh he hunah hian a tel a ni.

Dr. C. Lalnuntluanga, President, Mizoram IT Society (MITS) chuan Online Training buatsaih a nih dan leh hmalak chhoh dante, training-na atanga zir chhuah tur point pathum: (i) Content creation/development (ii) Content delivery leh (iii) Assessment & Evaluation chungchangte sawifiahin, zirtirtuten a taka an hman nghal theih tur zir chhuah a nih theihna tur atana inbuatsaihna leh ruahmannate siam a nih dan te a sawi a.

He Online Training-ah hian Mizoram IT Society (MITS) leh Mizoram Mathematics Society (MMS) atangin Resource Person atan Pu Vanlalzarzoliana, Faculty, NIELIT, Mizoram IT Society, Pu Vanlalhuma, Teacher Govt. Mizo H/S, Mizoram Mathematics Society (MMS), Pu H. Lalthazela, Lecturer Govt. Mizo HSS, Mizoram Mathematics Society (MMS), Pu C. Zoremsanga, Scientist ‘C’, NIELIT, Mizoram IT Society leh Dr. C. Zorammuana, Assistant Professor, Lunglei Govt. College, Mizoram Mathematics Society te hman an ni.

He Online Training-ah hian Zirtirtu 351 telin zirtirtu thawklaiten an sikul lama tunlai thiamna hmanga zirtirna an kalpui dan pholanna an nei a. Software man nei lo chi leh device hman dan awlsam chi hrang hrang te, Content siam te, Youtube-a thil upload dan te, online hmanga zirtirna pek kaihhnawih chi hrang hrangte inhrilhhriat a ni. He programme hi hman tangkai chhunzawm zel a nih theihna turin Human Resources Development Board, Youtube Channel-ah dah a ni.