No.2010/2021-2022

Aizawl, the 26th August 2021: Vawiin khan Mizoram State Law Commission chu an Chairman Pu Lala Khobung hovin a office chamber-ah an thukhawm a, tun tum hi Law Commission thukhawm vawi 39-na a ni. Chairman chuan member-te inpeknaah lawmthu a sawi a, ram leh hnam tan an thiamna leh ngaihtuahnate nasa lehzuala hmang turin a sawm. Covid-19 vangin Law Commission-in duh angin hna a thawk chak thei lo chu pawi a tih thu a sawi bawk. Vawiin meeting-ah hian thu pawimawh tak tak sawiho leh rel a ni a, chungte chu :

Article 342 of the Constitution of India behchhana President of India-in order pawimawh tak mai ‘The Constitution (Scheduled Tribes) Order 1950 (Part III - Rules and Order under the Constitution)’-ah chuan Scheduled Tribe list a tarchhuak a, Mizo hnam pumpui sawina ni awm takin ‘Any Mizo (Lushai) Tribe’ tih a ziak a ni. He thil hi chik zawka en chuan Mizo tih awmzia chu ‘Lushai’ tihna ni awm takin a lang thei ta a, Lushai nilo Mizo hnahthlak dang tan hian Mizo zinga tel ve lo leh Mizo hian a huam ve lo a inngaihna a awm thei a, harsatna neuh neuh a awm phah bawk a ni. Assam-ah chuan Autonomous District chhunga Zohnahthlakte chauh recognised an ni a, Tripura leh State tam zawk leh Union Territories-ah te hian ‘Mizo’ tih hi a lang ve lo.

Mara leh Lai hnamte pawh an hnam hming dik tak zawk nia an hriat avangin an District Council hming ni thin ‘Pawi’ leh ‘Lakher’ pawh ‘Lai’ leh ‘Mara’ in thlak a ni a. Mahse ‘The Constitution (Scheduled Tribes) Order, 1950’-ah Pawi leh Lakher tih an la ni reng.

India Danpui Article 344(1) leh 351 tlawhchhana siam Eighth Schedule-ah hian Assamese / Bodo / Manipuri / Nepali, adt. tawngte (languages) telh a nih vangin All India Service Competitive Exam hrang hrang UPSC, SSC leh State Public Service Commission huaihawtah hian subject / syllabus-ah an tawng a tel ve avangin nasa takin a chhawk. Eighth Schedule-ah Mizo tawng a la tel ve lo hi Mizoten midang an tluk lohna chhan pakhatah Law Commission chuan a ngai a ni.

Chapter IX of Criminal Procedure Code (Cr.P.C.)-ah mawhphurhna (maintenance) hi Nupui, Fanaute leh Nu leh Pa te chauh a huam a. Tunlai hian Pi leh Pu (grandparents) te ngaihtuahtu mumal awm lo an awm ta zeuh zeuh.

Mizorama Autonomous District Council-ah te hian defection (pawl pakhat atanga pawl danga insawn) a awm thin vangin sawrkar nghet din theih loh chang a awm thin a, hei hian corruption a hrin thei a ni. Autonomous Council ten anmahni Rules siam hmanga Anti-Defection law an neih / siam te chu Dan mit atanga thlirin a dik tawk lo.

Heng a chunga thu pawimawhte hi ngun taka ngaihtuah leh sawiho a nih hnuah state sorkarah a hnuai mi ang hian Mizoram State Law Commission chuan thlen turin a rel :
1. The Constitution (Scheduled Tribes) Order, 1950 Schedule-a entry 10 of Part II - Assam, entry 17 of Part X - Manipur, entry 10 of Part XI - Meghalaya, entry 10 of Part XVII - Mizoram te-a ‘Any Mizo (Lushai) Tribe’ tihah hian bracket leh Lushai hi paihin ‘Any Mizo Tribe’ tih ni se.
2. The Constitution (Scheduled Tribes) Order, 1950 Part II - Assam-a ‘In the Autonomous Districts of Karbi Anglong and North Cachar Hills’ tih hi paih ni se.
3. The Constitution (Scheduled Tribes) Order, 1950 huamchhunga ‘Pawi’ leh ‘Lakher’ inziakte hi ‘Lai’ leh ‘Mara’ a thlak vat ni se.
4. The Constitution (Scheduled Tribes) Order, 1950 hnuaia Scheduled Tribes List State leh Union Territories-a ‘Any Mizo Tribe’ tih la tel ve lote-ah ‘Any Mizo Tribe’ hi telh vek ni se.
5. Article 344 (1) leh 351 of the Constitution of India tlawhchhana siam Eighth Schedule-ah Mizo tawng (language) hi telh ve nise.
6. Chapter IX of Criminal Procedure (Cr.P.C.) huamchhunga a mawhphurhna (maintenance)-ah hian ‘Grand Father and Grand Mother’ hi telh ni se.
7. Tenth Schedule to the Constitution of India (Provisions as to disqualification on grounds of defection) hi Mizorama Autonomous District Council-ah te hman ni se.

The Mizo Marriage, Divorce and Inheritance of Property Act, 2014 tuna hman mekah siamthat leh ennawn ngaite, MHIP Gen. Hqrs. leh Central YMA atanga rawtna leh Autonomous District Council atanga thu lutte sawiho niin ngun lehzuala zirchian chhunzawm leh tura tih a ni. S.167 of Cr.P.C. a Magistrate te thuneihna (power), i.e. chargesheet submit hmaa Jail-a an dah theih hunchhungte pawh sawiho a ni a, hei pawh la zirchian leh tha tih a ni.

Mizoram State Law Commission-ah hian Chairman Pu Lala Khobung leh Member Secretary-ah Pu Zahmingthanga Ralte, Joint Secretary, Law & Judicial Department niin Member-te chu :
1. Pu Diganta Das, Advocate General, Mizoram.
2. Pi Helen Dawngliani, MJS, Secretary, Law & Judicial Dept.
3. Pu N. Zakhai, CEM, Mara Autonomous District Council
4. Pu Manghmunga Chinzah, CEM, Lai Autonomous District Council
5. Pu R.M. Chakma, CEM, Chakma Autonomous District Council
6. Pu Liansangzuala, MJS, President, Mizoram Judicial Service Assn.
7. Pu Anil Rinliana Malhotra, Advocate, President, Mizoram Bar Assn.
8. Pu C. Zoramchhana, Addl. Advocate General, Mizoram
9. Pu Saihminglaina Sailo, Addl. Government Advocate, Mizoram
10. Pu C. Lalrinchhunga, Addl. Government Advocate, Mizoram