Education Minister Pu Lalsawta chuan Mizorama college hrang hrang Principal-te, Higher and Technical hotute leh UK Skill Providers-te inkawmkhawmna chu vawiin khan Higher and Technical Education Department Conference Hall-ah a hmanpui.
Education Minister chuan UK Skill Providers te nena inkawmna hun an nei thei chu lawmawm a tih thu a sawi a. Mizoramah lehkhathiam hna hmulo in register rigawt pawh 41,000 an nih tawh avangin kan zirna kalphungah her danglam ngai a awm nual tih a chiang hle a. Lehkhathiam leh certificate tha tak tak neih mai piah lamah mi chhawrtlak leh hmantlak siam chu zirna in a ngaih pawihmawh ber tur a ni, a ti bawk. Hemi kawngah hian UK Skill Providers te nena an thawhhona chuan rah tha tak a chhuah a beisei thu Pu Lalsawta chuan a sawi.
UK Skill Providers team te hi John Yates (Manipal City & Guilds), Karan Singh leh Anol (British Council), Sudeshna Chaterjee (Bournville College) leh Association Of Colleges atangin John Phillip te an ni. Tunlai khawvel thang zel mila zirna kalpui pawimawhzia thu leh Mizorama thalaite chu sorkar hna mai nilova hnadang tha tak tak an hmuh theih dan zirtir leh kawng kawhhmuh chu an tum ber a ni tih an sawi a ni.
Skill providers-te hian naktuk (18th September, 2013)-ah Govt. Hrangbana College Golden Hall-ah zirtirna pe in Finance Minister Pu Liansailova’n a hman pui ang a, ni 19 Septemer 2013 ah Govt. Mizo High School Indoor Stadium-ah mipui kalkhawmte nen sawihona an nei bawk ang.
