No.4468/2021-2022
Aizawl, 31st March, 2022 : Vawiin khan Hotel Regency Conference Hall, Aizawl-ah AISHE 2019-20 report thlir ho niin Mizoram dinhmunte uluk taka sawiho a ni. He hun hi Dr Vanlaltanpuia, Higher & Technical Education Board Vice Chairman chuan khuallian niin a hmanpui a. Human Resources Development Board Vice Chairman Pu L.Thangmawia leh Pu Laltanpuia, Joint Director cum QAC, Higher & Technical Education ten he hun hi an hmanpui bawk a ni.

He hunah hian khuallian Dr Vanlaltanpuia chuan Gross Enrolment Ratio (GER) 2019-20 (data thar ber) atanga a lan danin Mizoram GER chu 25.7 a nih laia National GER average chu Mizoram aia sang 27.1 a ni hi thil enchian ngai tak a ni a ti a. Mizoram chu India ram state zingah ziak leh chhiar thiam tamna, Literacy rate sanna ber state zinga mi ni si a thalai kum 18-23 inkar, Higher studies a in ziaklut (enrolled) an tlem em em anga report a lang hi thil enzui ngai tak ni a a hriatthu a sawi. He data hian khawpui leh thingtlanga zirna rualkhai taka kalpui dan turte, zirtirtu semrual dan turte, sawrkar sum hman dan tur thlengin a nghawng dawn a ni a ti. Hemi chungchangah hian concerned departments, a bik takin School Education leh Higher & Technical Education te bakah mimal researcher ten ngaihtuahna nasa zawk seng turin a ngen bawk a ni.

He hun kaihruaitu Prof Jamal Hussain, Department of Mathematics, MZU, State Nodal Officer, AISHE, Mizoram Unit chuan power point hmangin he report sawifiahna a nei a, Higher & Technical Education department leh Mizoram chhunga College leh zirna insang te nena an thawhhona tha tak avangin lawmthu a sawi a, an thawhrimna avangin a hun takah Mizoram data hi AISHE portalah kumtin thehluh hman a ni thin a ni a ti.