677/2022-2023

Aizawl, the 28^thMay 2022 : Nimin tlai khan Higher & Technical changtu Minister Dr. R. Lalthangliana leh Union Minister of State for External Affairs & Education Dr. Rajkumar Ranjan Singh te chu Hotel Floria ah inkawmna tawi an nei a, Dr. R. Lalthangliana’n Union Minister hi Bangladesh nena ramri a insumdawn tawnna kalpui anih theih nan hmalakpui turin leh Mizoram University Southern Campus din anih theih nan theihtawp chhuahpui turin a ngen a. Minister hi Commerce & Industrial Development Board Vice Chairman Pu K. Laldawngliana MLA in a tawiawm a. Union Minister hi Dr. R. Lalthangliana’n Hotel Floria ah zanriah a buatsaih sak bawk a ni.

Dr. R. Lalthangliana chuan thla hmasaa Bangladesh Commerce Minister Pu Tipu Munshi a Mizoram a lo zin tumah Bangladesh leh Mizoram ten ramri a sumdawnna an kalpui theih nana thil pawimawh tih hmasak ngai chungchanga thuchhuah intawm an siam chu Union Minister hi hrilhin India lamin tih tur a nei ve nual a, hengte hi Ministry of External Affairs chan lam anih avangin he thuchhuah intawm a India tih tur te chu ngaipawimawh sak turin leh tihhlawhtlin sak ngei turin a ngen a. Mizoram University Southern Campus Lunglei chu Ministry of Education in a thuphungin din phalna pe mahse hemi atan sum ruahman a awm loh avangin MZU Southern Campus  din chungchanga MZU lamin hma an lak theih loh thu hrilhin MZU Southern Campus din anih theih nan Education changtu anih angina theihtawp chhuahpui turin a ngen a. Hemi bakah RUSA chungchang pawh Union Minister hi sawipui a ni. 

Union Minister of State for External Affairs Dr. Rajkumar Ranjan Singh chuan Prime Minister Narendra Modi’n a Arunachal Pradesh leh Ladakh ramri a cheng mipuite ten nitin khawsak harsatna avanga an khuate an rauhsan thin chu a vei avangin tunhnaia ramri a khua te hi a ngaihpawimawhin, inkalpawhna leh an hmasawnna chungchanga hmalakna te a sawi a. New Education Policy 2020 chungchang, a bik takin zirna in sang zawk leh zirna sang zawkte tihchangtlun Sawrkarin a tum dante sawiin National Higher Education Commission kaltlangin thil tam tak ruahman mek a ni, a ti a. Mizoram in insumdawn tawnna chungchanga Sawrkar Laipui puihna a ngen te, MZU Southern Campus chungchangte chu a lo en tur thu Dr. R. Lalthangliana chu a hrilh a ni. 

Meeting tawite ah hian Principal Secretary, Higher Education Dr. Esther Lalruatkimi chuan Dr. Rajkumar Ranjan Singh chu Hmarchhak state zawng zawngte chuan hetiang dinhmun sang tak a chelh avangin an ngaihsan leh an chuang hle thu sawiin Hmarchhak harsatna leh mamawh hretu Sawrkar Laipui ah a fawng chelhtu zinga an awm chu Hmarchhak tan thil lawmawm tak ani, a ti.

Meeting ah hian Higher & Technical Education Department leh Commerce & Industries Department senior officer-te an tel a ni.