No.3774/2020-2021

Aizawl, the 4th August 2020 : Vawiin khan Higher & Technical Education Department enkawltu Minister Dr. R. Lalthangliana hovin SEDP hnuaia Higher & Technical Education Board din chu a vawi khatna atan SAD Conference hall ah an thukhawm a. Meeting ah hian he Board Vice Chairman atana ruat Dr. Vanlaltanpuia, MYC Chairman ni bawk leh Board Member 7 te leh Department hotute an tel a ni.

Dr. R. Lalthangliana, Board Chairman ni bawk chuan Board Vice Chairman leh Board Member te lawmna leh inhmelhriattirna hun a hmang a. Board Vice Chairman ah Dr. Vanlaltanpuia leh Board member ah tawnhriat tam tak nei ruat an ni chu lawmawm tiin zirna sang zawk hmasawnna atan Board hnathawhah an thawhhlawk ngei a ring tih a sawi. Hripui leng avangin zirna sang zawk bei turin phai lamah zirlai an kal theih dawn loh avangin zirlai tam takin Mizoram college ah zirna an chhunzawn a ngai dawn a, zirlai a tam thei ang ber college ten an admit theih nan Sawrkar in theihtawp chhuahin remruatna a siam mek thu a sawi.

Dr. Vanlaltanpuia chuan tunhnaia lawk maia Sawrkar Laipuiin zirna kalphung thar New Education Policy a puan chungchang sawiin kalphung tharah thil thar inthlak a tam a, state te kan inher rem hle a ngai dawn a, chuvangin Board hian pawimawhna a nei viau dawn niin a lang a ni, a ti.

Meeting ah hian Mizoram University hnuaia Lunglei a Southern Campus dinna tur chungchang a bik takin state in a dinna atana ram pek tur chungchanga hma lak tawhna te, college te tih changtlunna atana RUSA hnuaia hlawhtlinna leh hmalakna hrang hrang te, RUSA hnuaia sak Pukpuia Mizoram Engineering College sak zawh tawh dinhmun leh hemi atan a kawng, tui leh eng mamawh dan te, Higher & Technical Education Department in zirna sang zawk atana hmalakna a neih mek leh hmachhawp te, Polytechnic thar hawn tur chungchang te leh zirna in sang zawka zirna tha ‘Quality and Excellence in Higher Education’ neih dan tur chungchangte chu sawiho a ni.