Vawiin khan Higher & Technical Education Minister Dr. R. Lalthangliana'n Mizoram Hindi Training College Durtlanga, Mizoram College Teachers' Association (MCTA) General Conference vawi 41-na nghah chu khuallian niin Conference Session hmasa zawk a hmanpui a. Minister hi Higher & Technical Education Department Director Pu R. Zarzosanga, IAS in a tawiawm a ni.

Dr. R. Lalthangliana chuan ziak leh chhiar thiamna literacy a pawimawh rualin a aiin zirna kawnga a pawimawh lai ber chu quality zirna hi a ni tiin quality zirna tel lovin hna hmuh a harsa tawha chuvangin zirtirtuten, zirlai naupang thiamna tak tak nei leh mihring chhawrtlak an chherchhuah a tul thu a sawi a, chutianga tan la turin college zirtirtute a fuih a ni. College tha tehfung NAAC Accreditation in college dinhmun nasa takin a siam danglam tiin tunah Mizorama College tam zawk B Grade ni mekte chu A Grade a an inhlankai thei nan college zirtirtute chu tan la turin a fuih a. Zirtirtute te tan mahni zirlai naupangte hriatchiana, an chanchin leh an dinhmun te an nu leh fate hriattir chu thil tha a ni tiin Minister chuan zirna kawnga zirlai hnufum bikte a bika kaihhruaina in chung zirlai dinhmun a siam that thei thu a sawi tel bawk a ni.  

Higher & Technical Education Minister chuan college zirna chungchang sawiin RUSA kaltlanga college hmun hma te tih changtlun a nih mek thu te leh Asst. Professor 70 lak anih thu te tarlangin partime a thawk mek te chu contract a chingfel chho mek a ni, a ti a. Zirtirtu leh non-teaching staff ( (a pawimawh zual bik)indaih lohna chu a hriatpuiin  heng post ruak te hnawhkhah ani thei nan Sawrkarin tan a la mek tih a sawi a. Principal post thenkhat ruak in college inrelbawlna kawngah harsatna a thlen chu a ngaipawimawh thu sawiin Minister chuan heng post te hi a rang thei ang berah lak ani ang a ti a. Mahse chung hunah chuan a tling te Aizawla college ah te awm vek inchuh lovin Sawrkarin a dahna apianga, zirna tha Mizoram hmun danga awm te pawhin an nei thei nan leh tan lakna tur hmunah an awm a ni tih te chu rilru a nei a pawimawh thu te a sawi tel bawk a ni.  

Conference hawnna session chu MCTA Vice President Pu Lalbiakzuala'n kaihruaiin, an pawl President Dr. PL Ramliana'n palai inlawmna thuchah a sawi a. Pu Samuel J. Lalthanzaua chuan Pawl thil tih leh hmalakna te sawiin a hnen atangin bReport ngaihthlak a ni a. An Member kumin chhunga boral mi 3 sunna hun a hmang bawk a ni. Mizoram Hindi Training College Principal Dr. Louis Hauhnar pawhin thusawina neiin an College chanchin te a tarlang a ni.

MCTA chuan 7th UGC Pay Arrear belhkhawm cheng vaibelchhe 39 bawr vel Central Sawrkarin an pek chu lawmawm tiin Arrear an lak thei nana Minister in theihtawp a chhuahsak avangin a hnena lawmthu a sawi a ni.

Chawhnu session ah Agenda lut te sawikhawmin hun an hmanga a. Tlai session ah MCTA thar hruaitu thlanna neiin MJA hotute ten inthlanna hi an buaipui a ni.

MCTA hi Mizoram Sawrkar hnuai awm College 24 a zirtirtute inzawmkhawm pawl a ni a, Member 617 a awm a, chunga zinga chuan Professor 28, Associate Professor 405 leh Assistant Professor 184 te an ni. Kumin chhungin Member 15 pension a chhuak an nei a ni.