Vawiin khan Ni 6 chhung awh tur I&PR department leh Mizoram Art Development Society buatsaih Annual Art Exhibition chu I&PR Director Pi Lallianpuii’n M.C.Cabe Hall, Aijal Club-ah a hawng.

Hawnna thu sawiin Pi Lallianpuii chuan Mizo ten kawng hrang hrangah hma kan sawn nasa em em a, mitin hian engtikawng zawng emaw berin tangkaina kan nei theuh a, kan mizia leh kan rilru sukthlek azirin kawng hrang hrangin tuina bik kan nei thin a, chung zingah chuan Pathian thilsiam ropui tak tak te mawi taka phochhuak thin tute chu artist te hi an ni a ti a. Artist-te hlutna sawiin mipui vantlangin an ngaihtuah leh suangtuah phak loh thil an ngaihtuahin mawi tak takin an pho chhuak thin a ni a ti. Mizoram Art Development Society in lemziak lama tuite leh talent nei tha te zawng chhuak tura hma an la thin chu fakawm a tih thu sawiin school-level painting competition buatsaih tura an inpuahchahna ah duhsakna a hlan nghal a, art tangkaizia hi mipuite leh sawrkar pawhin an hre telh telh a, human resource development atana hmalakna peng pawimawh tak a ni bawk a ni a ti. New Delhi a mizo lemziak thiamte kutchhuak phochhuahna art exhibition neihin rah tha a chhuah thu tarlangin kum thar tir lamah Kolkata a art exhibition nei turin ruahmanna kalpui mek a ni a ti bawk.

 Mizoram Art Development Society hnuaiah hian member 80 chuang hret an awm a, annual art exhibition hi kum 2013 atang khan I&PR department nen tang rualin kum tin November thla apiangin an buatsaih thin a ni. Tun tum annual art exhibition hi November ni 7-13. 2019 chhunga neih tur niin, art exhibition neihna hmun M.C. Cabe hall, Aijal Club ah hian lemziak thiam 38 leh milem tuk thiam 1 kutchhuak hrang hrang 78 tarchhuah a ni a, a duh apiang tan zing dar 10:00 atanga tlai dar 5:00 thleng a tlawh theih a, an kutchhuak phochhuah te hi a lei theih bawk a ni.

Annual art exhibition ah hian artist-te kutchhuak thar chi hrang hrang khawi hmunah mah la tarchhuah loh chiah phochhuah  thin a ni a, lemziaktu hrang hrang te kutchhuak Charcoal, Watercolor, Oil, Acrylic leh Mixed Medium-te hmangin lemziak chi hrang hrang phochhuah a ni a, lemtuktu te kutchhuak thing leh hmanraw chi hrang hrang hmanga siam phochhuah a ni bawk.