Vawiin khan Agriculture Minister Pu C.Lalrinsanga chuan ni hnih awh tur National Seminar on National Resource Management for Sustainable Development chu Mizoram University Auditorium-ah  hawngin, khuallian a ni a, Bamboo Development Board Vice-Chairman Dr K.Pachhunga chu khualzahawm a ni bawk a ni.

Khuallian Pu C.Lalrinsanga chuan Mizoram leilung hausakna awm thei te sawi langin, ramhmul damdawi lama awmze neia hmalak a tul thu leh, ram leilung ti chhe lo zawnga lo neih a tul tawh zia te a sawi a. Kawng hrang hrangah Mizoramin hma a lak mek thu leh tun dinhmuna Van Dhan Mission Project hnuaia National Resource Management hna tan mek a nih tur te a sawi a, leitha siamna hmunpui, Bio fertilizer Centre din a nih dawn thu te a sawi bawk a ni.

Khualzahawm Dr. K.Pachhunga pawhin thu sawiin, Mizoram chuan mau leh rua-ah hausakna tam tak la haichhuah loh a nei avangin, Mizoram University a researcher te hnenah chuan hetiang kawng a an research project te pawh her turin leh hmala turin Professors leh research students te chu a ngen a ni.

Seminar-ah hian technical session 13 awmin, paper presentation 64 leh poster presentation 6 a awm a ni. Seminar buatsaihtu Department of Geography ten an buatsaih lehkhabu leh journal pali  Khuallian hian a release nghal bawk a ni.

He Seminar in a tum ber chu sik leh sa inthlak danglam nasa tak avanga harsatna hrang hrang lo awm buaipui dan tur te a ni.