Pu B. Lalchhawntluanga chuan PMMVY chu scheme tha leh chhenfakawm tak a nih thu sawiin, Lawngtlai District-ah hlawhtling taka kalpui a nih zel theih nan thawktute chu theih tawp chhuah turin a fuih a. Lawngtlai District Programme Officer Pi Vanlalhruaii pawhin thu sawiin, PMMVY diltu chuan bank account an neih ngei a ngaih avanga thiltlang kilkhawra mite'n harsatna an tawh thin thu leh awlsam taka bank account an hawn theihna tur ruahmansak dan awm se, harsatna tam tak chu sut kian theih a nih a beisei thu a sawi.
He hunah hian District Programme Coordinator F. Lalengvari'n powerpoint presentation hmangin PMMVY chungchang leh Lawngtlai District dinhmun tlangpui a sawi fiah a. Lawngtlai District chhunga he hamthatna dawng thei turte'n kim taka an hriat a, a taka an dawn ngei theih nana a puanzar kawng leh buaina tam ber bank account chungchanga harsatna su kiang tura hma lak dan tur te sawi ho a ni.
PMMVY hi hmeichhe nau pai leh nau pawmte'n hriselna leh inenkawlna lam an ngaihthah avanga nu leh nausen thihna thleng tam tak tihziaawmna tur leh nute'n nau an pai laia uluk taka an inenkawl a, damdawi in ngeia nau neih an intihhmuh theih nana ruahman niin, India ram dan anga pasal nei, kum 19 chin nu nau pai leh fa sen pawmte hamthatna tur a ni a. January ni 1, 2017 atang khan India ramah hman tan niin, an fa hmasa ber tur pai emaw pawm mek emaw, hri danna lak ngai zawng zawng la vek, nau pai vanga hamthatna dang dawn tur nei ve lote chuan he scheme hnuaiah hian tanpuina Rs 5,000/- an dawng thei dawn a ni.
PMMVY hnuaia hamthatna dawng tur hian mahni awmna veng atanga anganwadi centre hnai berah nau pai atanga ni 150 ral hmain inchhinchhiahtir a, Mother-Child Protection (MCP) Card neih ngei a ngai a. Nau pai atanga ni 730 (kum 2) chhunga dil hman ngei ngei a ngai bawk.
Kum 2018 August thla atanga 2019 October thla thleng khan Lawngtlai District bikah mi 1046-in PMMVY hnuaiah hian tanpuina an dawng tawh a. Tanpuina hi installment thuma pek niin, installment dawng kim tawh leh la dawng kim lo te pawh an awm a, installment hrang hrang (1st, 2nd & 3rd) pek chhuah tawh zat chu 3749 a ni. Pawisa pek chhuah tawh zat hi Rs 41,45,000/- niin, tanpuina hi Public Financial Management System (PFMS) kal tlangin a dawngtu bank account-ah direct benefit transfer hmanga thun thin a ni.
