Vawiin hian Serchhip District Beti Bachao Beti Padhao Task Force Committee te chuan Monthly Girl Child Day an lo kalpui tawh thin kal zelah Serchhip District Hospital-a hmeichhe naupiang thar pahnih te chu an en.

Ministry of Women & Child Development kaltlanga Government of India Flagship Programme pakhat hmeichhe nau piang thar te lo lawma, tha taka enkawl puitling tura inzirtirna hmalakna Beti Bachao Beti Padhao, Serchhip District hmalaknaah thla tin ni 5 na (5th of every month) chu Monthly Girl Child Day atana thlan niin he niah hian District Hospital-ah hmeichhe fa piang thar en tur an awm chuan en thin an ni a. Thilpek te pawh hlan thin an ni.

Tun November ni 5 ah pawh hian Serchhip Hospital nau neihna Ward-ah hmeichhe naupiang thar pahnih awmin BBBP District Task Force aiawhte chuan heng fanu thar pahnih te hi an en sak a, an nute hnenah thilpek hlan nghal an ni. Monthly Girl Child Day ni tak nimin lamah heng fanu thar te hi District Task Force te hian an en hman tak loh avangin vawiin hian an en ta zawk a, fanu thar en te hi Pi Lalhlimpuii, Serchhip Vengchung fanu leh Pi Zonunmawii, Thenzawl fanu te an ni a, an nute hnenah hian New Born Diaper Pack hnih leh pawisa fai Rs. 500 hlan ve ve an ni a. District Task Force aiawhin Dr. ZD Zomuanawma, Medical Superintendent leh Pu Denny Lalchhuanawma, MCS, SDC, Nodal Officer, BBBP Serchhip District leh Pu K. Saitluanga, DIPRO ten naute enna hi an hlan a. Pu K. Saitluanga hian naute nu leh pa te hnenah an naute an en chhan leh BBBP hmalakna langsar zual te hrilhfiahin, an fanu thar chu tha tak enkawl tum ngei turin a chah a ni.

Tin, BBBP hmalakna thovin heng fanu thar neite hi an veng MHIP chuan naupuan engemawzatin an en leh bawk ang.