Vawiin hian Serchhip DC Pi Sangchhin Chinzah, BBBP District Task Force Chairman ni bawk hovin a pisaah Serchhip District Beti Bachao Beti Padhao (BBBP) Task Force Committee te chu an thukhawm a, kum 2019-2020 annual plan thlir hona an nei.

Chairman Pi Sangchhin Chinzah chuan, BBBP hmalakna tluang taka kalpui chhoh zel a nih avangin lawmthu a sawi a, hmalakna kal mek leh hmabak la awm te pawh tha taka kalpui a nih theih nan theihtawp chhuah zel turin line department aiawh kalkhawm te chu a chah a ni.

Nodal Officer Pu Denny Lalchhuanawma’n Action Plan 2019-20 chungchang sawifiahna a nei hmasa a, Action Plan chhunga line department ten tih tur hrang hrang an neih te chu chipchiar taka sawiho leh ngai a la nih avangin hapta hnih hnu velah meeting hi koh leh ni se tia rel a ni.

BBBP hi Central sawrkar Flagship programme pawimawh tak niin ram chhunga hmeichhe naupiang leh hmeichhiate chawikanna kawng niin Serchhip District ah pawh hmalakna hi kalpui mek a ni a. Line Department hrang hrang Health, Education, Social Welfare, Police, Child Protection lam te leh khawtlanga pawl hrang hrang te nena thawh hona engemawzat kalpui mek a ni.