Serchhip District chhung khaw hrang hrang leh Damdawi In hrang hranga Nau piang leh mitthi chhinchhiahtu Registrar of Births & Deaths te chuan DRO Office Conference Hall ah ni hnih awh tur Annual Training an nei mek. Nimin khan Birth & Death Certificate an pek chhuah dan endikna (Cross Checking) neih niin Registrar of Births & Deaths Materials semchhuah a ni tawh a, vawiinah pawh Pi Sangchhin Chinzah, Bawrhsap hovin training hi neih chhunzawm leh a ni.

He Annual Training hawngtu Pi Sangchhin Chinzah , District Registrar leh District Bawrhsap ni bawk chuan, Serchhip District chhung khaw hrang hranga Registrar of Births & Deaths te thawhrimnaah lawmthu a sawi a, nasa lehzuala inpekna nena hnathawh a tul thu sawiin an thil chhinchhiah chu ram pum nghawng thei thil a nih thu a hrilh. Ram hmasawn nan Statistics dik leh rintlak kan mamawh hle reng a, democracy ram kan nih angin khua leh tui chhinchhiahna fel tak kan mamawh reng bawk, in hna hi hna hote angin lang mahse hna pawimawh tak a ni tih in hriatreng ka duh a ni, tia chahin training hlawk taka hmang tura duhsakna a hlan a ni.

Pu Lalrikhuma Sailo, Director, Economics & Statistics pawhin thusawiin, India ramah Registrar of Births & Deaths Act  chu  Kum  1969 khan an lo passed tawh a, Mizoramah pawh Kum 1985 atanga  hman  a nih thute sawiin, he dan in a tum  ber  chu  India ram a piang leh thi zawng zawng te felfai tak chhinchhiah hi a ni, a ti. Sawrkarin heng Births & Deaths Certificate te hi Document pawimawh atan a hman  avangin he hnathawktu Distict chhung khaw hrang hrang atanga RB&D te chu fimkhur, felfai leh dik taka thawk turin a chah a, hmun thenkhatah dik lo taka sum lak luh nana hmang an lo awm kha a pawi hle a, Serchhip District chhungah erawh chuan kan fihlim a, a lawmawm hle a ni, a ti. India State zingah Mizoram chu za a za registration kalpui thei kan ni a, Registrar te inpek rah liau liau a ni, a ti.
 
Trainingah hian  Pu K. Zodinpuia, Data Processing Assistant chuan Civil Registration System(CRS) chungchang zirtirna pe in, zawhna leh chhanna hun an hman ho bakah sawiho ngaite an sawiho bawk ani.

He Training hi Pu Manliana, District Research Officer, Serchhip chuan a kaihhruai a, Serchhip District chhunga Registrar of Births & Deaths mi 46 te bakah Pi Sappari, Inspector of Statistics, Pu J. Ramdinmawia, Inspector RB&D leh Nl. Jenny Ramhmangaihi te leh thawktu dang ten an telpui a. Sailulak khua a Registrar of Births & Deaths chatuan ram pan ta Pu F. Kungliana sunna hun hman a ni bawk.