2773/2024-2025

30.10.2024: Vawiin khan Mizoram Secretariat Conference Hall, MINECO-ah Higher & Technical Education Minister Dr Vanlalthlana kaihhruaina hnuaiah ‘Consultative Meeting on Draft Mizoram State University Bill’ chu stakeholder-te nen neih a ni a. He hunah hian Higher & Technical Education department official-te, Mizoram College Teachers’ Association (MCTA) aiawh leh state sawrkar hnuaia college thlan bikte aṭangin Principal leh faculty member-te an tel a ni.

‘Consultative Meeting on Draft Mizoram State University Bill’ ṭhut khawmnaah hian draft bill-a sawi ho ṭula hriat lai te sawi hovin zawhna leh chhanna hun hman a ni a, sawi fiah ngaite sawi fiah niin sawi hona hun ṭangkai tak hman a ni. Draft Mizoram State University Bill hi House-a a put luh theih turin Cabinet meeting-a thlir ho tura chhawp chhuah ni ang.

Tun dinhmunah he hmalakna, Mizoram State University din tura ruahmanna atan hian Bill Drafting Committee leh Study Team din tawh niin Study Team hian Cluster University of Srinagar leh Cluster University of Jammu kal dan zir chiangin Bill Drafting Committee thlir ho turin an theh lut tawh a. Draft bill hi Finance Department leh Law & Judicial Department nen pawh Higher & Technical Education Minister kaihhruaina hnuaiah enho tawh a ni bawk.

Draft Mizoram State University Bill-ah hian Mizoram State University chu postgraduate programme zirna tura ruahman a nih bakah, multidisciplinary leh research-oriented institute ni tura duan a ni a. Hemi tur hian ram luah turte pawh en thlithlai ṭan niin state-in resource a neih sa zir chian mek a ni a. A bul aṭanga State University thar hlak din a hautak dawn avangin, state college thlan bik pali (4) chu sawikhawmin cluster university neia Mizoram State University hi din tura ruahman a ni.

National Education Policy 2020 chuan State University la nei lote chu kum 15 chhunga din turin a beisei a. Tun dinhmuna Mizoramin a hrana State University a neih loh avang leh, a awm sa Mizoram University leh ICFAI te chu Central University leh private university a nih avangin NEP 2020 duh danin Mizoram sawrkar chuan ke a pen chhoh a ngai a. Mizoram State University hi din a nih chuan tuna state sawrkar hnuaia college-te chu State University hian a enkawl tawh dawn a ni.