2774/2024-2025

Dated Serchhip, the 30^th October, 2024: Vawiin khan Serchhip District Agriculture Marketing Committee (DAMC) chu an Chairman Pu Paul L.Khuma, District Bawrhsap hoin DC Meeting Hall ah an thukhawm a.  Handholding hnuaia thlai tharchhuah lakkhawmna hmun tur te leh he scheme hnuaia society din thar te chungchang an sawiho.

Mizoram Sawrkar hmalakna pui ber Bana Kaih - Handholding Scheme hnuaiah hian thlai chi li dah niin chung te chu - sawhthing, aieng, hmarcha leh hmunphiah te an ni a. Heng thlai thar chhuaktu farmer te chu society ah ziahluh an ni dawn a. Serchhip District chhungah khaw 39 awmin Sawrkarin inkaihhruaina a siam angin khawtinah society pakhat theuh din a ni dawn a. Vawiin meeting-ah hian heng khaw 39 atanga society din tur rawtna lutte thlir ho niin DAMC chuan a pawmpui a ni. 

Society member ten thlai thar an chhun khawmna tur Primary Collection Centre (PCC) hi khaw tinah pakhat theuh din a ni dawn a. A din tar tur leh a hmun tur te hi Society te kutah a awm dawn a ni. Society te hi Cooperative Society (PACS) te guideline zulzuia din tur niin vawiin DAMC thukhawm chuan an inkaihhruaina dan terms of reference mumal takin siamsak ni se, tiin an rel a ni. 

Serchhip District chhunga khaw 39 te chu cluster 4 ah DAMC chuan a then a. Chungte chu - Khawlailung cluster, Thenzawl cluster, Serchhip cluster leh Chhingchhip cluster te an ni a. Heng cluster tinah hian Secondary Collection Centre (SCC) pakhat theuh siam a ni ang. Secondary Collection Centre hmunhma tur hi a rang lama enfiah nghal ni se, tih niin, line department - Agriculture, Horticulture leh Soil Department te kutah dah a ni. 

Quality endik leh chhinchhiah chungchangah Primary Collection Centre tin ten rualkhai zawka an hman theih tur profoma siam sak ni se tiin Committee chuan a rel a. PCC te leh SCC te hnathawh dan endik, an sum che vel enfel (audit) leh pawimawh dangte vil tu tur pawh DMC hian vawiin meeting-ah hian a ruat fel nghal a ni.

Additional DC kaihhruaina hnuaiah training a rang lama kalpui tur a ni a. Karleh chhungin training calendar leh a kaihhnawih dang ruahmanna te peihfel nghal a ni dawn a. Society member te, PCC leh SCC a mawhphurhna neitute zawng zawng tan training hi November thla chhungin vawi engemawzat buatsaih a ni dawn a ni. 

Vawiin meeting ah hian DAMC member te MAMB Co-opted Member Pu Isack Lalremruata te an tel a. DC Pu Paul L.Khuma chuan chanvo hrang hrang neitu member te thahnemngai taka an mawhphurhna te hlenchhuak theuh turin a sawm a ni.