3043/2023-2024

Aizawl, the 14th December 2023 : Higher & Technical Education Minister Dr. Vanlalthlana’n vawiin khan Mizoram College Teachers’ Association (MCTA) General Conference vawi 44-na, Govt. Aizawl College, Mualpui ah a hmanpui.

Minister Dr. Vanlathlana chuan Politics leh Ramrawngbawlna lama a zinkawng leh hmalaknate, leh a hmachhawpte a sawi hnuah, Zirtirtu anih anga Higher and Technical Education Department a chan avangin a lawm leh phur thu a sawi a. Education/Higher Eduaction leh NEP lama hmachhawp leh a pawimawhna te a sawi langin, System thar Higher Education-in a mamawhna thu te, infrastructure tih changtlung a tulnate, State University din a pawimawhna leh hmalak an tum thu te a sawi lang bawk a ni.

College zirtirtute tehfung thar, Faculty Grading System, Sawrkar tharin a kalpui tum thu tar langin Minister chuan hei hian zirtirtute tan a lak tir piah bakah zirtirna kawng ah nasa taka a puih theih thu a sawi lang a. College ah te zirna in hma a sawn thei nan NAAC Accreditation pawimawhna te sawi zauin College tin leh zirtirtute hmasawnna lam hawia tan la zel turin a fuih a, Research leh Research Project pawimawhna leh heng te kalpui zel tur leh heng lama tan turin college zirtirtute kalkhawm a fuih bawk.