3042/2023-2024

Aizawl 14th December, 2023 : Aizawl District Bharat Scouts & Guides buatsaih Eco - Friendly Grand Campfire chu vawiin khan CYMA Hall, Tuikhuahtlangah Pu C. Lalsawivunga, Art & Culture, etc. Minister chuan khuallian niin a hawng.

Khuallian Art & Culture Minister chuan Scouts & Guides te'n Eco - Friendly Grand Campfire an buatsaih chu thil lawmawm tak a nih thu sawiin Scouts & Guides chu khawvela pawl lian ber, 33 millions vel awmna pawl ropui tak a ni a. Guinness World Record-ah pawh an chuan hial thu a sawi a. He movement-a dan leh thutiamte hi zawm vek ila chuan Jail pawhin luahtu a nei lo thei hial ang tiin an Movement chu nungchang tha inzirna hmun leh khawhawi zauna remchang tak a ni a. Member te chu unau vek kan nih angin he pawl dinchhuaktu Robert Baden - Powell-a suangtuah ang vawngthar turin a chah.

Scouts & Guides danin min phut angin khua leh tui tha ni a, mi rintlak, rinawm, aia upa zahthiam, thudika huaisen ngam ni ila, inren thiamin kan ngaihtuahna thianghlim se, he movement kal tlang hian ram leh hnam siam that hna thawk tlang ila, thawk lova ei tum lovin taima taka hna thawk a, hlawhtlinna hmu ngei turin kalkhawmte chu a sawmin a chah.

Pu Lalnunhlua, State Chief Commissioner, MBS&G, Director, Sports & Youth Services Department ni bawk pawhin he hunah hian thu a sawi bawk.

Tun dinhmunah Aizawl District-ah Scouts/Guides 1143 leh Unit Leader 72 an awm mek a. Tritya Sopan 345 leh Rajya Puraskar 154 an awm mek bawk a ni.

He hun hi Dr. Lalzirmawia Chhangte, IAS, President, ADBS&G & Secretary, School Education chuan kaihruaiin kalkhawmte lawmna thu a sawi a. Dr. Lalhmingmawia Ralte, District Secretary chuan report a pe a. Zirna In hrang hrang atangin Special Item hmuhnawm tak tak thlirho a nih bakah zaithiam zai ngaihthlak a ni a. Dr. H. Lalnghakliana, MBBS, MS (Ortho), Vice President, Aizawl District BS&G chuan lawmthu a sawi a ni.