3041/2023-2024

14.12.2023 : Mizoram Legislative Assembly-a Leader of Opposition, Pu Lalchhandama Ralte, M.L.A chuan vawiin khan Assembly Secretariat Annexe Building-a a Office a luah lut.

Pu Lalchhandama Ralte chuan Leader of Opposition dinhmun luah thei khawpa thlawptu MLA a nei tling chu lawmawm a tih thu a sawi a. He dinhmun hi a awmna tura Pathianin a ruat a nih ngei a beisei thu leh ram leh mipui tan sorkar khalh ngil tura theihtawp chhuah a tum thu a sawi bawk.

Mizoram Legislative Assembly-ah hian Leader of Opposition tling phak turin MLA 10 talin Leader atana an pawm nih a ngai a, kum 15 chhung zet Leader of Opposition hi neih a lo ni tawh lo a ni. Pu Lalchhandama Ralte, MLA, Leader of Opposition atana Speaker-in a pawmna hi ni 13.12.2023 khan Notification tihchhuah a ni.

Leader of Opposition-in Office a luah luh naah hian MLA dang ten an tawiawm a ni.

The Mizoram  Salaries and Allowances of the Leader of Opposition Act, 1999 in a tarlan danin Leader of Opposition hi hlawh leh facilities-ah Cabinet Minister tlukpui a ni.