719/2024-2025 

Aizawl, the 7th June: Vawiin khan School Education Department leh Higher & Technical  Department hotute chuan Higher & Technical Education Minister, Dr.Vanlalthlana hoin Conference Room, Samagra Shiksha Office, Mc Donald Hill, Aizawlah thutkhawmna an nei a ni.

He hunah hian Minister Dr. Vanlalthlana chuan Education World Forum London-a ni 19th-22nd May 2024-a neih taka hun a va hman atanga a zir chhuah pawimawh tak takte a sawi a, tunlai khawvel Artificial Intelligence (AI)-in min luhchilh tawh ziate sawiin, hemi hmachhawn tura kan inpuahchah a tul tih a sawi bawk. AI leh a kaihhnawih hrang hrangte zirlaite tana hman tangkai theih dan tur a tarlang a, Education Outcome Fund atanga puihna dawn theih dante ngaihtuah a tul tih a sawi bawk a ni.

Minister chuan Education World Forum 2024-ah hian hotu lu pawimawh tak takte hmelhriatin a kawm a, naupang zirna lama hmasawn thei turin an puihna a ngen nghal a ni.

He thutkhawmnaah hian Education World forum 2024-a thupui hrang hrang “Encouraging AI understanding, Building human relationships and resilience, and accelerating climate action” chungchangte sawiho a ni a. Zirlaiten an tangkaipui zawk nan zirna in, school leh college syllabus-ah te AI, basic coding, data analysis te telh ni se tih rawtna siam nghal a ni. He thutkhawmna hi zawhna leh chhanna a khar a ni.