718/2024-2025

2024 Nikir thla ni 7: Vawiin khan Lawngtlai District Level Committee on Myanmar and Bangladesh Refugees chu an Chairman, Lawngtlai District Bawrhsap Pu Cheemala Siva Gopal Reddy hovin Lawngtlai DC Conference Hall-ah an ṭhu khawm a. Myanmar leh Bangladesh aṭanga raltlan lo lutte chungchang thil pawimawh hrang hrang an sawi ho.

He hunah hian Lawngtlai District Superintendent of Police Pu R. Lokeshwaran bakah, sawrkar official hrang hrangte leh Central Young Lai Association (CYLA) hruaitu te an tel a. Lawngtlai District Task Group on Myanmar & Bangladesh Refugees Nodal Officer & Sub-Divisional Officer (Sadar) Pi Margaret J. Vanlalremmawii hnen aṭangin Lawngtlai District chhunga raltlan dinhmun report ngaihthlak a ni a. Senior Chief Medical Officer, District Civil Supply Officer leh Block Development Officer-te bakah, CYLA General Secretary hnen aṭangin raltlan chungchanga an hma lak dan report ngaihthlak a ni bawk.

Health department chuan raltlante tan a thlawna inentirna (free clinic) buatsaih, a thlawna damdawi sem, hri danna pek leh thosilen sem te an lo kalpui tawh a. Tun hnaiah Chamdur 'P' leh Vaṭhuampuiah te free clinic buatsaih leh turin ruahmanna kalpui mek a ni bawk a. Raltlan lo lut vanga natna inkai chhawn theih a darh loh nana raltlante thlithlai leh a ṭul anga an dinhmun endik turin health department aṭangin hma lak chhunzawm dan ngaihtuah ni se, tih a ni a. DCSO office chuan fur laia tla tur buhfai chhek khawl hna an kalpui mek rualin, raltlante tana buhfai pek tur kep thei tura hma lak dan ngaihtuah ni se, tih a ni a. Sawrkar bakah CYLA leh pawl dang aṭanga raltlante chhawmdawlna leh ṭanpuina pek ṭhin chungchang te pawh sawi ho a ni bawk.

Lawngtlai DC office-in an chhinchhiah danin, tun dinhmunah Lawngtlai District chhungah Myanmar aṭanga raltlan lo lut mi 5,922 (mipa puitling 1,860; hmeichhe puitling 2,049 leh kum 18 hnuai lam 2,013) awm mekin, relief camp 38-ah leh khaw hrang hrang 55-ah an awm darh a. Myanmar aṭanga raltlan lo lut chhinchhiah hnuhnung ber chu April ni 25, 2024-a Hruitezawla lo lut an ni.

Bangladesh aṭanga raltlan mi 1,872 (mipa puitling 580; hmeichhe puitling 499 leh kum 18 hnuai lam 793) awm ve thungin, relief camp 12-ah leh khaw hrang hrang 11-ah an awm darh a. Bangladesh aṭanga raltlan lo lut chhinchhiah hnuhnung ber chu June ni 3, 2024 kha niin, hemi ṭum hian Chamdur P-I-ah mi 28 (chhungkaw 11) an lo lut a ni.

Tuna Lawngtlai District-a raltlan awm mekte hi kum 2021 (Covid lai) aṭang khan lo lut ṭanin, a khat tawka lo luh belh zelin, tun hnai lawk (May-June, 2024) pawh khan Bangladesh aṭangin mi 191 an lo luh belh leh a. Sawrkar lam leh tlawmngai pawl hrang hrang aṭanga ṭanpuina lut hmangin raltlante chhawmdawlna hi kalpui ṭhin a ni.