Vawiin chawhma khan Higher & Technical Education Minister Pu R.Romawia chu Govt. Johnson College Students’ Union buatsaih Fresher Social cum Graduation Day, Vanapa Hall-ah khuallian a ni.
Khuallian Pu R.Romawia chuan College Zirlaite leh Zirtirtu te’n hun tha an pe chu lawmawm a ti a. Ram hmasawnna a kal zel a, sum pawh kumtinin siambelh zel a ni a, tun dinhmun aia sangah College hmun hma te pawh awm zel turin beisei ila, tiin a sawi a. Zirna piah lamah mahni kut kawia eizawnna lam zirna subject hrang hrangte pawh a ram pum angin mamawh belh zel a ni a, heti lama ngaihtuahna seng fo zel turin zirtirtute a sawm a ni. Business Management, Commerce leh Economics Department te hi ram thang lai chuan kan mamawh bik a ni, a ti a. Ram leh hnamin a mamawh a zira College te pawh kan her rem zel hi hmasawnna atan a pawimawh a ni, a ti a. Minister chuan tumruhna leh taimakna zirlaiten an neih chuan an hma-ah hlawhtlinna in a nghak a ti bawk a ni. Zirlaite zingah mahni kut kawia enzawn tumna a awm chho zel chu rahbi pawimawh tak a tling a ni, a ti a. Mizo Zirlaite ram pumpui exam-ah te pawh chhuanawm tak tak an awm a ni, a ti a. Zirtirtute pawh Doctorate Degree la neilo te pawh nei turin a fuih bawk a, degree bakah research publication lamah te pawh tan la leh zual turin a fuih tel bawk a ni.
Govt. Johnson College, Khatla-ah hian Academic Session thar a tan fresher 473 an awm a, zirlai Graduate thar 112 an awm bawk a ni. Zirlai awm zawng zawng hi 900 bawr vel an ni.
Khatla Arts & Commerce College leh Bungkawn College chu hmunkhatah chhungin Kum 2002 khan Pu PB John hming chawiin Govt. Johnson College tih a lo ni ta a ni. Tun dinhmunah hian Mizoram College 21 zingah a 5-na niin, zirlai ti tha zualte hnenah Prof. Darchhawna Award, Dr. Vanlalhluna Award, Pu Lalthlengliana Award leh a dangte pawh kum tin an pe thin a ni.
