No.696/2021-2022

Aizawl, 27^th May, 2021 : Vawiin khan Higher & Technical Education Minister Dr R. Lalthangliana hovin SAD Conference Hall, MINECO-ah COVID-19 hripui len vanga Mizoram chhunga College leh University zirlaite harsatna tawh chungchang sawiho a ni.

Vawiin meetingah hian COVID-19 hrileng vanga rei tak regular class kalpui theih a nih tawh loh avanga online class kalpui thin a nih thu sawi niin, college leh university zirlaite ten kum tin an chawi thin fee pangngai chi hrang hrang piah lamah online class kalpui nan internet data manah an insenso nasat avanga harsatna an tawh chu uluk taka sawiho a nih hnuah Commissioner & Secretary, Higher & Technical hovin uluk taka a rang thei ang bera zirlaite tana zangkhai thei tur anga ruahmanna siam nise an ti.

Online class kalpui chungchanga harsatna chi hrang hrang zirlaite leh leh zirtirtuten an tawh, a bik takin internet connection leh power supply chungchang pawh sawiho niin, Telecom sector hi Central subject a nih avanga state sawrkar tan duh anga hmalak chak a har thu tarlan a ni a, a bik takin NH-54 laih zauh hna thawh a nih avanga optical fibre hmun tak taka tih chah a nih vanga internet connection in a tawrh thu te,power supply mumal loh avanga mobile tower in an tawrh thute tarlan niin, a theih ang anga hmalak dan dap nise an ti a. COVID-19 Task Force on Mobile & Internet Services sawrkarin a din thar dawn thu leh vawiin lamah hriattirna pawh tihchhuah a nih beisei thu sawi a ni a, anni pawh theihtawp chhuah tura ngen nise an ti a ni.

Vawiin meetingah hian online-based Learning Management System siam a pawimawh thu tarlan niin hemi chungchanga hmalak theih dan leh a ruahman dan turte Pu Lalthlamuana, Chief Informatics Officer-in a sawifiah a, Meeting kaihruaitu Minister chuan a bawhzui turin committee an din vat dawn tih a sawi n ghal a ni.

Vawiin meetingah hian zirlaite lehkha zir lo thei lo, zir mumal hleithei si lova an awm chu an khawngaihthlak thu leh an rilru leh ngaihtuahna thlenga an tawrh thu sawichhuah niin, a bik takin zirlaite an khuaa an haw darh hnuah internet connection leh power supply mumal lohna hmun tam tak a mi ten online class kalpui chungchangah harsatna an tawk a ni, tih sawi a ni a, hemi atan hian ruahmanna awmze nei deuh hlek siam a, a tul anga State Executive Committee on State Disaster Management hnenah hmalaksak tura thlen nise an ti a. Second Wave boruak hetiang a nih tawh rual hian Third Wave lo la thleng tur nia mithiamten an sawi avangin hmalam hun thui tak thlir chunga ruahmanna siam a tul tih an sawi.

Vawiin meetingah hian Higher & Technical Department hotute, Mizoram University Registrar, Chief Informatics Officer, ICT Department, P&E Department aiawh, College Prinicipals’ Council aiawh, Mizoram College Teachers’ Association aiawh, Non-Government Colleges aiawhte leh Mizoram University Student’s Council aiawhte an tel a ni.