2066/2023-2024

Hnahthial the 29th September 2023: Higher & Technical Education Minister leh Bialtu MLA ni bawk Dr R Lalthangliana chuan vawiin khan Chanmari Branch YMA Hnahthial kum 50 tlin lawmna (Golden Jubilee Celebration)chu Khuallian niin a hmanpui a, Jubilee hriatrengna lungphun hawnna neiin souvenir a tlangzarh nghal.

Khuallian Dr R Lalthangliana chuan kalkhawm mipuite chu Jubilee chibai bukin vawiin hun chu hlim taka hmang turin duhsakna a hlan a. Chanmari Branch YMA Hnahthial in kum 50 a tlin lawmna pualin Chanmari-ah Health Clinic din phalna lehkha ziak leh thilpek a hlan nghal a ni. Hnahthial chu District dangdai tak a ni tiin tlawm ngailo lalnu Ropuiliani leh lal Zakapa te chhuahna District a ni chu inchhuanna tham a ni a ti a, chu chuan Hnahthial District thalaite ah hnam hmangaihna rilru tuh phah se a tih thu sawiin vawiin hun chu Hnam hmangaihna kaithotu ni se a tih thu a sawi bawk.Hnam pui leh changkang apiangin mahni Hnam ziarang leh Hnam thilte ngaih hlut nachang an hria a ti a, Pi Pu te sulhnu hre reng a Mizo zemawi Tlawmngaihna chhawmnung zel turin a chah a, chutiang kawnga thawh hlawk tak, khawvel hmun danga hmuh tur awmlo YMA chu fakawm a tih thu a sawiin tih dan tha te chu vawnhim zel a pawimawh a ti bawk.

Ram leh hnam damna tur a thalaite pawimawhzia sawiin thanharh a hun hle a ti a. Kum zabi 21 na chu inelna khawvel, a thiam ber, a taima ber leh ti tang tang peihte damkhawchhuahna a ni tiin engkimah midang aia tei rei peih turin a chah a ni. Hnam dangte laka nekchepa awm mai a hlauhawm tiin hospital tha tak tak leh building tha tak tak ding thluah mahse thiamna nei Mizo thalai rual an awm si loh chuan a lawmawm dan a dang hle a ni a ti bawk. Mizoram chu India ramah ziak leh chhiar thiamna lamah 2 a ni t?in lawmawm hle a ti a. Chutih rual chuan thiamna tak tak neih a ngai a ti bawk. JICA sum hmanga sak tur Mizoram State Cancer Super Speciality Hospital pawh thawktu Mizo thalai an awm ngei theih nan tang turin thalaite fuihin vawiin Jubilee lawmna hun chuan thalaite rilru ah tumruhna hring chhuak se a tih thu a sawi bawk a ni. Khuallian chuan Mizo mipa boral an tam ta lutuk chu a runthlak hle tiin Mizo mipa te chu an hriselna ngai pawimawh turin a chah a, mahni nunna chu engemaw chenah mahni kuta a innghah thu sawiin mahni,chhungkua ,khawtlang tan leh ram tan hriselna vawng fo turin a chah a ni.

Golden Jubilee lawmna hun hi Chanmari Branch YMA Vice President Pu B Lalremsanga chuan a kaihruai a, Rev. TC Vanmalsawma, BCM Hnahthial South Bialtu chuan hunserh hmangin Pu K Rohluahpuia, President Chanmari Branch YMA chuan welcome speech a sawi a ni. Branch YMA Secretary Pu CS Vanlalkunga hnen atangin report tawi ngaihthlak niin Pu K Lalremliana VCP Hnahthial S-iii chuan thusawi tawi a nei bawk.

Vawiin hun hi session-2 a then niin chawhnu session ah hruaitu hlui chawimawina, zaihona, hnam lam leh ruai nen hlim taka hun hman ho a ni.