1494/2023-2024

Hnahthial The 14th August 2023: Higher & Technical Education Minister Dr R Lalthangliana chuan vawiin khan Govt. Hnahthial College Freshers’ Social cum Graduation Day chu Auditorium-ah a hmanpui a, Govt Hnahthial College Students’ Union buatsaih magazine leh kum 2018-2023 chhunga a Department enkawl hrang hrang; Higher & Technical Education Department, Health & Family Welfare Department leh Commerce & Industries Department hmalakna thenkhat tarlanna bu a tlangzarh bakah Govt Hnahthial College Hostel mamawh leina tur cheng Nuai 3 a hlan bawk a ni.

Minister leh Bialtu MLA ni bawk Dr R Lalthangliana chuan Govt Hnahthial College 11th annual magazine ‘Lawhleng’ a tlangzarh thei chu lawmawm a tih thu a sawi a, an kal lehzelna turah duhsakna a hlan bawk a ni. A Department enkawl pathumte hmalakna tarlanna lehkhabu chungchang pawh sawiin Minister chuan hmalakna zawng zawngte chu tarlan vek sen a ni lo a ti a, a then a zar chauh tarlan a ni tiin tangkai taka hman a nih theih nan lehkhabu chu buatsaih a nih thu a tarlang.

Khuallian Dr R Lalthangliana chuan NAAC Accreditation-ah Mizoram chu India rama titha ber - pakhatna dinhmun luahtu niin 83% a hmuh tawh thu leh a dawttu chu Chandigarh niin 60% an hmuh thu a tarlang a; NEP 2020 tihhlawhtlin nan Mizoram chuan State University nei turin hma a lak mek thu leh Cabinet-ah pawh sawi hovin a tul angte bawhzui turin Higher & Technical Education Department kutah dah a nih thu a sawi bakah Zoram Medical College (ZMC) ah kumin kumtir khan mi 100 dawnin MBBS an zir chhuah thu leh internship tih theih nan National Medical Commission in Recognition a rawn pe chu a lawmna ti zualtu a nih thu a sawi bawk.

Minister chuan Govt Hnahthial College in ‘Symposium on Sustainable Development Goals’-2023, College zirlai hrang hrang ten project siama, inelna an neihah Mizoram pumah pakhatna a hauh chu chhuanawm a ti hle a. College zahpuiawmlo tak leh quality tak a ni tih a tarlang a ti bawk. Tunlai khawvelah thiamna tak tak neih a tul tawh a ti a. Kum zabi 21-na a thiamna leh technology thang chak takte chu hman tangkai thiam a tul hle a ti. Hnahthial District atanga hlawhltinna chang tawh tam takte tarlangin Minister chuan tuna zirlaite pawh mi hlawhtling tak tak ah an la chhuak vek thei tih in hre reng turin a chah a. Chutianga inrintawkna neih tir tur chuan zirtirtute pawh an inbuatsaih a tul thu hle a ti bawk.

Dr R Lalthangliana chuan Graduate tharte chu a lawmpui rualin hringnuna harsatna tam tak karah pawh nghing loa hmalam pan tlat thin turin a chah a, an rilru leh an ngaituahnate zauh a, zir zawh a awm loh thu hre reng turin a chah. Nihna tur thlan dik a pawimawh thu sawi bawkin Minister chuan ngun taka ngaituah a, mi fing leh remhre zawkte thurawn la thin tur leh ngaihtuahna fim tak nena thutlukna siam thin turin a chah bawk. A sawi zelnaah hriselna a pawimawh hle a ti bawk a; Ram changkanga an damrei chhan chu taksa insawizawi, tui in tam leh chi ei tlem a ni tiin Mizo thalaite pawh lifestyle hrisel zawk thlang fo turin a chah a, hriselna hloh chuan engkim a hloh a ni tih hre reng tura chahin chhungkua, khawtlang, ram leh hnam tan hriselna ngaihpawimawh theuh a tul a ti bawk. Retheihna chu hlawhtlinna daltu a hmang lo turin leh a pawimawh ber chu rilru ngaituahna a nih thu sawiin ‘midang pawhin an theih chuan ka thei ve tur a ni’ tih rilru pu tlat turin kalkhawmte a chah a, khawvel danglam chho zelin a ken tel banphaka zirtirna kalpui a tul tiin chumi umpha tur chuan mitin tangrual a thawkho turin a sawm bawk a ni.

Vawiina Freshers’ Social cum Graduation Day-ah hian Pu B.Lalrinsanga, Jt.Director, H&TE pawhin thu sawiin Mizoram chu Northeast mai ni lovin India ram pumah zirna hmunpui ni thei dinhmunah a din mek thu a sawi bawk. Govt. Hnahthial College Principal Pu Lalsiamthanga chuan kalkhawmte lawmna thu a sawi a, Students’ Union General Secretary Lalmalsawmdawngkimi’n report pein college tana inpe leh thawkhlawkte chawimawina hun chu Dr Zothanpuii leh Pu Vanlalrova Varte ten an hmang a ni. Graduation day pual hian Govt Hnahthial college zirlaite zinga tithate chawimawina leh lawmman hlanna neih ni bawkin SU Vice President Lalthlamuanpuia chuẩn lawmthu sawiin hun a khar a ni.

Govt Hnahthial College-ah hian zirlai 138 awm mekin mi 31 Graduate thar an awm a ni.