3643/2022-2023


Dated Serchhip, the 21st February, 2023: Nimin tlai khan Dr. R. Lalthangliana, Minister, Higher & Technical Education, Health, Commerce & Industries, etc., chuan Government Serchhip College Girl’s Hostel building thar a hawng.

Building thar hawnna inkhawm College Seminar Hall-ah buatsaih zui niin he hunah hian Minister chuan, Mizoram State Day ah Govt. Serchhip College Girl’s Hostel kan hawng thei hi a lawmawm hle a, Memorundum of Settlement kum 1986 kuma kan ziah zarah Mizoramin University kan neih phaha, vawiinah chuan India rama University tha pawl a lo tling ta, High Court te pawh hi MoU zara kan neih a ni a, tunah a building tur tha leh changtlung tak MINECO ah sak mek a ni. Tin, kan ram leilung leh a chhunga awmte ram leilung fate ngeiin kan neiha ro kal inrel theihnan inhungna dan fel tak kan nei bawk, tiin State kan nih hlutzia a tarlang a. Serchhip district chu Mizoram lailia awm, chhim leh hmar, chhak leh thlang atanga pan awlsam anih avangin zirna in tha ber ber kan pan khawm theih turte, Medical College thleng pawha dah hi a inhmeh em em a, ram lailia awm in nihna hi hman tangkai thiam a tha hle a ni, a ti. Vawiina kan hawn tak Girls Hostel pawh tha taka kalpui theih ngei turin hma kan la zui zel ang a, hmunhma tha tak tak in neihte hi tangkai taka hman kan tum zel ang, a ti bawk. Aizawl pawna College zinga NAAC A grade hmu thei hmasa ber Serchhip College hian Aizawl pawna College dangte a tiphurin chona a pe nasa em em a, kan College ten hma an sawn zawt zawt mai a ni, tiin Serchhip College hmalakna hrang hrangte a fak a, NAAC lamin engang Grade pawh min pe se kan College tinte hian Quality Education, khawvel inelna sang tak hmachhawn phak zirlai chherchhuah ngei i tum tlat ang u, a ti a ni.

He hunah hian Pi Nazuk Kumar, Serchhip bawrhsap pawhin thusawiin, New Education Policy tihhlawhtlinna tura hmalakna tam tak kalpui tan tawhna Serchhip College in Girl’s Hostel thar a nei hi a lawmawm hle a. College leh kan district tan hmasawnna nasa lawmawm tak a ni. Serchhip College ah hmalakna engemawzat kalpui reng a ni a, Extra Curricular Activities hrang hrang bakah Finishing School te kalpui niin thawktu engemawzatin Doctorate Degree an nei thar a, Mizorama NAAC A grade nei thei tlem te zinga mi a ni hial a, hetiang a nih theih nana sawrkarin min ngaihtuahna tinrengah lawmthu ka sawi a ni, a ti.

Prof. Benjamin Lalrinsanga, SNO, NEP pawhin thusawina neiin, Mizorama kan College hrang hranga thawktute inpekna vanga Mizoram chu NAAC Accredited College ngah ber pawl kan nih mek thu a tarlang a ni.

Inkhawm hi Pi K. Laldinpuii, Principal in a kaihruai a, Serchhip College Girl’s Hostel a puitlin theihna chhan chu Minister Dr R. Lalthangliana thahnemngaihna vang a ni. A tira UGC Grant sum kan dawn kha a tlem tham avangin State atangin a puitlinna tur sum min ngaihtuah saka vawiinah hlim takin kan hawng thei ta a ni, a ti a. Zirlai naupang awm nghal tur kan neih bawk si avang leh eirawngbawlna tur bungbel engmah kan la neih bawk si loh avangin kan manganna te bialtu MLA Pu Lalduhoma hnenah kan thlen leh a. Ani’n bungbel leina tur Rs. 50000 min pe bawk a, kan lawm hle a ni, a ti bawk.

Pu C. Laldintluanga, Vice Principal chuan Hostel an sak dan report leh lawmthusawina a nei a, he Hostel hi UGC Grant Rs. 40 lakh an dawn atanga bul tanin hun engemaw chen chu sum dawn chhunzawm loh vangin sak chhunzawm theih loh in a awm zui a, tunhnaiah Minister Dr. R. Lalthangliana hmalakna zarah State Fund atangin Rs. 17 lakh an dawng leh a, chumi hmang chuan luah theihin an peih ta a, naupang 24 leh Warden awm theihna tur building a ni.

Attachment

  • Loading attachment...