1476/2022-2023
Aizawl, 5th July, 2022 : Government Aizawl West College chuan vawiin chawhma dar 10:00 AM khan Vanapa Hall-ah Kal Tharte Lawmna (Freshers' Social) hun an hmang a. Higher & Technical Education Minister Dr R. Lalthangliana chuan he hun hi hmanpuiin zirlai zinga zirna kawng leh thil danga College tihmingthatute hnenah lawmpuina thuziak a hlan bawk a ni.
Kal tharte pual inkhawmah hian khuallian Dr R. Lalthangliana chuan Govt. Aizawl West College chu Aizawl khawpuia College upa berte zinga mi a nih thu sawiin tlawmte a bul tan ni mahse thawktute inpekna leh thahnemngaihna in rah tha a chhuah a, tunah chuan Mizorama College zingah zirlai ngah berte zinga mi an ni ta a ni, a ti a. Thawktuten zirlaite hmakhaw ngaia an indaihlohna phuhru tura ziritirtu rawih belhna atana thawhlawm an thawhkhawm thin chu entawntlak a ni, a ti a. College awmna hmun Dawrpui Vengthar kawngpui kama mi chu a hmun a chep bakah zirna boruak (academic atmosphere) tha zawk a awm theih beiseiin Luangmuala Commerce & Industries hmunah sawn chhuah tum a ni a, hemi atan hian engkim peihfel deuh vek tawh a ni a, rei lo teah a hmun tur hi tihfel a ni dawn a, hei hi hlawhtling tur chiang sa a ni, a ti a. NAAC assessment tum 4-na an hmachhawn turah duhsakna sang ber hlanin tha taka inbuatsaih turin a chah a, Grade A hmu ngei tura tan la turin fuihna thu a sawi bawk a ni.
Dr Thangtea chuan zirtirtute chu Mizoram chhung khua leh veng hrang hrang atanga zirlai kal khawm enkawltu an nih avangin zikchhuahna inang lo tak tak an ni lehzual dawn a, zirlaite enkawl kawngah pawh ngaihtuahna sen nasat a tul dawn bakah inbuatsaih uluk a ngai thin hle dawn a ni, a ti a. Zirlaite harsatna tawh leh dinhmun hrethiam taka hnathawh tur kawhhmuh thei tura anmahni pawh inbuatsaih thin tur leh zirlaite chher puitling the turin a chah a ni. Zirlaite pawh an zikchhuahna engpawh nise insit phah nan leh inrintawk lohna neih phah nan hmang lova, khawvel hi a phurawm zawnga hmachhawna chona tha tak anga thlira tumruhna nen mahni hma su kaw thei tura rilru leh taksa inbuatsaih tura chahin, taima leh tumruh tan khawiah pawh hlawhtlinna a awm a ni,a ti.
Kal tharte pual inkhawmah hian Principal Prof. C. Lalthlengliana chuan GAWC-a zirlai lut tharte lawmna thu a sawi bawk a ni.
Govt. Aizawl West College hi kum 1990 May ni 2 khan din niin a tirah zirtirtu 7 leh zirlai 150 an awm a, zan lamah class lak thin a ni. Kum 1992 March ni 9 khan NEHU hnuaiah Pre-University course hi rin luh niin degree course hi June ni 9, 1994 khan rinluh leh a ni a. Mizoram University kum 2002, July ni 2 a din a nih khan an insawn lut ve nghal a ni.
Tun dinhmunah hian Department 8 – English, Mizo, Public Administration, Psychology, History, Education, Political Science leh Economics a awm a, Mizorama College zingah History department-a Post Graduate Course zirtir awm chhun an ni bawk. Kuminah hian zirlai 1,050 an awm a, Principal leh zirtirtu 40 an awm mek a ni. Kuminah hian zirlai lut thar 498 an nei bawk a ni.
