3604/2022-2023

Aizawl, 16th February, 2023 : Higher & Technical Education minister Dr R. Lalthangliana chuan tun hnaia National Assessment and Accreditation Council (NAAC) endikna a A+ Grade hmutu Govt. J. Thankima College hotute vawiin khan a pisa ah lenga sawmin an hlawhtlinna lawmpuina atan lawmpuina thuziak (Certificate of Appreciation) a hlan. Govt. J. Thankima College aiawh hian an Principal Prof. JV Nunchunga’n chawimawina hi a dawng a ni.

Minister Dr R. Lalthangliana chuan Govt. J. Thankima College (GJC) in NAAC assessment “Grade C” atanga “Grade A+” an hmu chu hlawhtlinna ropui tak, awlsam taka c han mai theih a ni lo tih sawiin, Grade hrang hrang 4 zuan khum thei khawpa hma an sawnna leh an tumruhna hi a chhuanawm takzet tih sawiin, Mizoram tihmelthatu an ni, a ti a. NAAC assessment a “Grade A” hmu apiang chu lawmpuina hlan zel a tum thu a sawi bawk a ni.

Govt. J. Thankima College Principal Prof. JV Nunchunga pawhin Ministerin lawmpuina a hlan chu thinlung takin an lawm tih sawiin an hlawhtlinna chu GJC a thawktute leh zirlaite,a te ber atanga a lian ber thleng a an tanrualna leh Higher & Technical Education department hotuten theihtawp chhuaha tan an lakpui vang a ni tih a sawi a, hma sawn lehzual turin theihtawpin tan an la zel dawn tih a sawi bawk.

NAAC hian GJC hi vawi thum an endikna niin a vawi hnihna ah khan “Grade C” (CGPA 1.67) an hmu a, theihtawp chhuaha an tanna zarah endik vawi thumna (third cycle) December ni 15 & 16, 2022 ah “Grade A+” (CGPA 3.31) an hmu ta a ni.

Lalhmingthanga College, Durtlang (1.4.1992 a din) leh J.Thankima College, Bawngkawn (9.9.1993) a din te chu Mizoram sawrkarin chhun finin kum 2002 khan deficit ah a hlang kaia, a hmingah Govt. J. Thankima College tih a ni a. 14.8.2007 ah Mizoram University hnuaiah permanent affiliation an hmu a ni. GJTC hian campus hmun thumah neiin Central Campus, bawngkawnah hian zirna in leh building pawimawh dangte a awm a, Southern Campus, GJTC hmun hlui Bawngkawn hi Girls’ Hostel-ah hmangin Northern Campus, Lalhmingthanga College hmun hlui, Durtlang hi Boy’s Hostel atan an hmang a ni.

GJTC ah hian subject 8 zirtir a ni a, kuminah hian zirlai 1000 chuang awmin, Principal leh zirtirtu 40 leh thawktu dang 12 an awm mek a ni. Zirlai hi Mizoram chhung hmun hrang hrang bakah Manipur, Assam, Meghalaya leh Tripura atang an awm a, Myanmar leh Bangladesh atang pawhin zirlai an rawn kal a, zirlaite zingah tawng chi hrang hrang 21 hmang an awm mek a ni.