Vawiin khan Pachhunga University College seminar Hall-ah ni thum awh tur “International Conference on Recent Advances in Animal Sciences (ICRAAS) - 2019” hawnna inkhawm buatsaih a ni a, Higher & Technical Education Minister Dr. R. Lalthangliana chuan khuallian niin a hmanpui a, Mizoram University Registrar Dr. Lalnundanga chu khualzahawm a ni. He International Seminar hi nikuma Pachhunga University College diamond jubilee hriatreng nan a buatsaih a ni.

He hun hmanpuitu H&TE Minister Dr. R. Lalthangliana chuan Pachhunga University College a international seminar neih hmasak ber a thusawina hun a chang chu lawmawm a tih thu a sawi a, Pachhunga University in kawng hrang hranga hmuh theih a hmasawnna a nei chu lawmawm a tih thu sawiin kawng dik kan zawh mek zel a, zirlaite result pawh a chhuanawm thin hle a ni, a ti a. Tunlai khawvelah hlawhtling tur chuan thiam satliah mai a tawk tawh lova, thiam bik nih a tul tawh a ni tiin zirlai thiam bik chher chhuak tura tan la zel turin zirtirtute leh zirlaite a chah a ni.

Minister chuan Animal Science hnuaia hmasawnna hrang hrang te zirho a ni tur chu thil lawmawm tak a ni a ti a, Mizoram chu nungcha chi hrang hrang nei tha thin kan ni a, tun hnaiah nungcha te an tlem tial tial a, hei hi a veiawm em em a ni a ti a, International Conference hian heng nungchate humhalh leh sik leh sa venhim kawngah pawh rah tha a chhauh ngei a beisei thu a sawi a ni.

International Conference on Recent Advances in Animal Sciences (ICRAAS) – 2019 chhunga zirho atan hian research paper 132  thlan chhuah a ni a, India ram chhunga state hrang hrang 20 a academic leh research institution 30 bakah Germany atang resource person an rawn kal a, participant 160 inziaklutin scientist leh faculty 62, research scholar 57 leh zirlai 38 an tel bawk a ni.

November ni 6-8, 2019 chhunga neih tur International Conference ah hian technical session vawi kua neih a ni dawn a, oral presentation 72 leh poster presentation 60 a awm dawn a ni. Research paper tha zual thlanchhuah a ni ang a heng research paper te hi WOS & SCOPUS index journal ah tihchhuah tum a ni. Best presenter thlan a ni ang a young presenter zingah a titha pathum thlan chhuah an ni bawk ang.

ICRAAS 2019 hi department of  Zoology, PUC buatsaih a ni a, Mizoram sawrkar hnuaia Directorate of Fisheries, Directorate of Agriculture (R&D), Environment, Forest & Climate Change Department bakah Mizoram University, Mizo Academy of Sciences leh Mizoram Business Centre te chu co-organiser an ni.

ICRAAS 2019 hi Science & Engineering Research Board (SERB), DST, Government of India, Department of Biotechnology, Government of India leh North Eastern Council, Government of India ten an sponsor a ni.

International Conference on Recent Advances in Animal Sciences (ICRAAS) - 2019” hawnna inkhawm ah hian  Dr. Tawnenga, Principal, PUC chuan inlawmna thu a sawi a, Dr. H. Lalthanzara, Convener leh Dr. Lalnundanga, Registrar, MZU ten thu an sawi a, Dr. K. Lalchhandama, Organising Chairman, HoD Department of zoology ni bawkin lawmthu sawina in hnu a khar a ni.