Ni thum awh tur Veterinary Pathology Congress 2019  chu vawiin khan College of Veterinary Sciences and Animal Husbandry, Selesih ah neih tan a ni a.  Congress hawnna inkhawm CVSc& AH Auditorium-a  neih ah Prof. H.D. Narayanaswamy, Vice Chancellor, Karnataka Veterinary, Animal and Fisheries University (KV AFSU) chu khuallian niin   Prof. M. Premjit Singh, Vice Chancellor, Central Agricultural University, Imphal leh Prof. Matti Kuipel, Michigan State University, USA te chu khualzahawm an ni.  

Prof Narayanaswamy chuan ran natna, thlen thei hri zirna veterinary pathology chungchangah mithiam thawkte chuan ran natna hrik bakah mihring atana hlauhawm thei hri chungchangte, damdawi thar hmuchhuah lamah te leh tur leh a kaihhnawih chungchang te, an field chuan a hawl tel tawh tih a sawi a. Natna hri nuai bo tawh anga sawi leh natna hri thar hmuchhuah te chu veterinary pathology mai bakah human pathology lama thawk mithiam te tan pawh chona lian tak a ni, a ti a. Natna hri chungchangah, a zirbinga leh a report-na lamah fimkhur a tul thu te, intuaitharna leh inrawnkhawmna ang te neih reng a pawimawh thu te leh thiamna sang zelah mahni intuaihriam a tul reng tih te a thusawi a tarlang a ni.

Thusawitu dang Vice Chancellor, Central Agricultural University, Prof. M. Premjit Singh chuan Hmarchhaka  tlawhhma ram neih dan chu a darhsarh avangte leh ram chhung hmun dangte tehkhinin a danglam  avangtein ranvulh leh tlawhhma leh leipui leh huan nei te kalkawp tir chuan  loneitute thawhchhuah kum 2022 thlenga Sawrkarin in a let a tih pun programme a kalpui mek chu hawlhtling zawk nia a rin thu a sawi a. Ram chhung hmun danga loneitute mahnia intihlum a tam em laiin Hmarchhakah chuan hetiang hi hriat tur a awm ve lova tiin a chhan nia a rin chu hmanlai atangin ranvulh leh loneih chu helai mipui ten an lo kalkawp pui avangtein a nih a rinthu a sawi. Hmarchhaka tualchhung ran leh thlai te chu natna hri lakah an him zawka hriat anih avangin zirbingna a tam thei ang ber neih a tul thu a sawi bawk a ni.

Veterinary Pathology Congress 2019  ah hian mithiam 100 rual vel an tel a. Programme chi thum neih tura ruahman a ni a. Chungte chu 16th Annual Conference of Indian Association of Veterinary Pathologists te;  10th Annual meeting of Indian College of Veterinary Pathologists  leh 'Advances in Veterinary Pathology for fostering one health, food security and environment protection' tih thupui hmanga National Symposium te a ni.