Vawiin khan Pu R.Romawia, Higher & Technical Education Minister chuan State Project Directorate (RUSA), Mizoram buatsaih Consultative Meeting on State Higher Education Plan (SHEP), Aizawl West College Auditorium-ah khuallian niin hun a hmanpui.

Minister Pu R. Romawia chuan mithiam hmun hrang hrang atanga an sawmte lokal thei chu lawmawm, a ti a. Mi thahnemngai te avangin Mizoram zirna chuan hma a sawn a rin thu a sawi a. He meeting-a College Principal leh Mizoram University atanga Professor lokal te hnenah chuan zirna lama thurawn pe zel turin a sawm bawk a. RUSA (Rashtriya Uchchatar Shiksha Abhiyan) hnuaiah hian zirna sang zawk tih changtlun nan zirtirtu pawh tam tak lak a ni a. Amaherawhchu, sum harsatna avangin duhthusam angin hmasawn chak a harsa, a ti a. Budget-ah sawrkar chuan Education Department tan 2% aia tlem a dahna chungin, hmasawnna tam tak erawh a awm tih a sawi a. RUSA hotute’n thahnem an ngaih avangin leh midang tanpuina rilru an put avangin hmalam pan a ni a, Mizoram-a College te an lo phuisui zel a ni, a ti bawk a ni. College tha nei turin ram neih hmasak a pawimawh avangin, sawrkar chuan College te’n ram an neihna turin hmalak chhunzawm zel a ni a, beisei pawh a sang viau a ni, a ti a. RUSA hi tun dinhmunah chuan Mizoram College chawmtu lian ber a nih avangin hmachhawp lian tak (vision) neih a ngaih thu a sawi a. Kan inthlahpung chak avangin zirna tha leh zirna sang tha (quality education) neih chu a tul ngei ngei a ni tih hriain, ram mamawh chhanna duan chhuah a nih ngeina turin a sawm a ni.

RUSA Scheme hi Central Cabinet Committee chuan 31^st March, 2020 thleng chhunzawm turin a lo rel tawh a. RUSA Scheme hian Mizoram state tan fund vaibelchhia 87.06 pe tawhin, vaibelchhia 84.65 chu hman a ni tawh a, a bang vaibelchhe 2.41 (balanced payment) a awm a ni. Mizoram-ah hian Government College 21 hnenah college sak that nan nuai 20 theuh pek a ni tawh a. College pahnih (existing college) Hrangbana College leh Govt. Zirtiri Residential Science College-te  Model College an nih theih nan vaibelchhia 8 ve ve pek anni a. College thar Mizoram Engineering College, Pukpui, Lunglei atan vaibelchhia 26 pek a ni bawk a ni. RUSA hnuaiah hian Language Laboratory (Hindi, English), Remedial Classes, Career guidance leh Counseling, Gender Sensitization Campaign, Person with Disability Sensitization, Personality Development Program, Plans for Innovative Program te kalpui a ni. RUSA-in a tum ber chu zirlai chak lo leh hnufual te dawm kang a, chhawmdawl hi a ni a. Mizoram-ah chuan 10% Matching Share-ah harsatna hmundang angin an tawk ngai lo a, thawhhona tha tak neih a ni.

He hunah hian Mizoram University Professor te, College Principal te, NGO hruaitute leh midang tha hnem tak an tel.