No.3490/2020-2020 

Vawiin khan Higher & Technical Education Minister Dr. R. Lalthangliana hovin a pisa ah Mizoram chhunga Kohhran leh Private College hrang hrang Principal te an inkawm a, College admission chungchang leh thil pawimawh hrang hrang an sawiho. Minister hi Mizoram Youth Commission Chairman Dr. Vanlaltanpuia leh Higher & Technical Education hotulian ten an tawiawm a ni.

He hunah hian Higher & Technical Education Minister chuan kum dangah College admission chungchangah zirlaiten seat indaihlohna avanga harsatna an tawh thin laiin kuminah phei chuan COVID-19 hripui leng vanga lo haw, zirlai tam tak phai an zirna chhunzawm remchang tawhlo an awm dawn a, hei vang hian sawrkar pawh a lu a hai hle a ni a ti a. Zirlai admission changlo engemawzat an awm thei dawnin a lang a, sawrkar college te pawh insangmar turin kan ngen viau chungin kan dinhmun hi a la khirh hle a ni a ti a. Kan zavaia kan tan ho a ngai a, zirlai lakbelh thei turin in ngaihtuahna lo seng ula, a theih ang anga tan lo la turin ka ngen che u, tiin Private leh Kohhran College Principal kalkhawmte a chah a ni.

MYC Chairman Dr. Vanlaltanpuia pawhin zirna quality tha zirlaiten an hmuh a pawimawh thu sawiin, college zirtirtu leh hmunhma pawh zirlaite rilru tiphur thei zawnga inbuatsaih a tul thu a sawi.

Higher & Technical Education Director Pi K. Lalrinzuali pawhin thu sawiin Sawrkar College nilo tan pawh sawrkarin dan leh thil pawimawh dang zawm tura a duante tha taka zawm a pawimawh a, a bik takin hripui leng karah hian thawhhona tha kan neih chhunzawm zel a pawimawh takzet a ni, a ti a. UGC norms leh guidelines te ngaipawimawh hram hram tura chahin zirtirtu indaihlo lutuka inchhawr hian zirna quality a tichhe thei tih hre reng turin College principalte a chah a, Private College te inrelbawl dan tur Establishment Rules pawh sawrkarin a buatsaih mek tih a sawi bawk.

Mizoram sawrkarin permission a pek Private College 9 Principal-te chu vawiin inkawmhona ah hian an tel kim vek a. Private College Principal-te pawhin an college dinhmunte sawiin an theihtawp chhuah an tum thu an sawi a ni.

Mizorama Private College 9 te chu a hnuaia tarlan ang hi an ni :
1. HATIM, Lunglei (Arts & Commerce), kum 2006 a permission pek.
2. Kapthangi College, Lunglei (Arts), kum 2015 a permission pek.
3. Aizawl City College, Aizawl (Arts), kum 2015 a permission pek.
4. Divine Mercy College, Aizawl, (Management), kum 2016 a permission pek.
5. St. Xaviers’s College, Lengpui (Arts & Commerce), kum 2016 a permission pek.
6. Helen Lowry College, Aizawl (Arts & Commerce), kum 2016 a permission pek.
7. Mizoram Christian College, Aizawl (Arts & Commerce), kum 2019 a permission pek.
8. Faith College, Aizawl (Arts & Commerce), kum 2019 a permission pek.
9. Kawnpui College, Kawnpui (Arts), kum 2020 a permission pek.