No.3489/2020-2020 

Vawin ni 27 July, 2020 chhun dar 12 khan Lok Sabha MP leh Telephone Advisory Committee (TAC) Chairman  Pu C.Lalrosanga’n BSNL Office tlawhin, BSNL Staff ten an dinhmun leh an harsatna te an thlen a ni.

BSNL Staff te hian an harsatna hrang hrang te MP hnenah lo thlen in, General Manager, Dy. General Manager leh Asst. General Manager te Mizoram-ah an awm tak loh avanga hnathawh a harsat dan te, BNG router an neih loh avanga FTTH, Broadband leh Data Service dang a muan phah thu te, Aizawl leh Shillong inkar bandwidth pawh nasa taka mamawh a nih thu te, development leh maintenance hna chi hrang hrang atan BSNL, Mizoram hian tun hnaiah Fund a hmuh that loh avanga harsatna awm te bakah BSNL hnuaia contract-a hnathawk te rei tak hlawh an lak theih loh avanga an mangan thu te, staff 40 lai mai Voluntary Pension a kaltir an nih avanga hnathawktu an in daih loh thu te MP Pu C.Lalrosanga hnenah hian an lo thlen a ni.

BSNL Staff te harsatna lo dawng sawngin Pu C. Lalrosanga chuan heng an harsatna hrang hrang an sawi te chhinchhiahin, a rang thei ang berin a tulna ang angah hma a lo laksak nghal tur thu a sawi a, BGN router pawh rang taka an neih theih nan hmalak nghal a ni ang, tiin a sawi a ni. An in relbawlna leh hlawh chungchanga an harsatna leh an mamawh ang te theih tawp chhuaha a lo bawhzui dawn thu leh a tul leh mamawh apiang chu a hnen a thlen hreh lo turin BSNL Staff te hi a chah a ni. MP Pu C. Lalrosanga chuan an harsatna hrang hrang an sawite chu chinfel a nih theih na'na remchang hmasa bera Union Minister for Electronics and Information Technology and Communications Ravi Shankar Prasad hnena thlen a tum thu leh Parliament-ah pawh zawhna zawh a tum thu a sawi bawk a ni.

MP (Lok Sabha) leh TAC Chairman Pu C. Lalrosanga hi TAC Member thar, Pu Biak Thansanga, Pu Lalliankima, Dr. JC. Zomuanthanga, Pu H. Vanlalrawna leh Pu H.C. Vanlalruata ten an tawiawm a ni.