No.3488/2020-2020

Dated Champhai, the 27th July, 2020: Vawiin chawhma khan Champhai DC Conference Hall-ah thla thar August Ni 15 a Independence Day 2020 lawm dan tur ngaihtuahtu Independence Day Celebration Committee chu an Chairman District Bawrhsap Pi Maria C.T Zuali hovin an thukhawm.

Meeting chuan India ramin zalenna a hmuh ni August Ni 15 chu Covid-19 hrileng vangin kum dang anga ropui taka lawm theih ni dawn lo mahse, sawrkarin ruahmanna a duan zulzuiin lawmna hun buatsaih nise a ti a. Champhai District chhunga lawmna pui ber tur chu Chhangphut Field-ah chawhma dar 10:30 atanga neih tan nise, Official leh sawm bikte chuan chawhma dar 10:00 ah Chhangphut Field thleng kim vek tawh se tih a ni a. August Ni 14, 2020 ah inpuahchahna leh enchhinna hnuhnung neih nise tih a ni bawk.

Kumin Independence Day lawmnaah hian Parade Contingent leh Pipe Band-te an awm dawn lova, Police leh NCC te erawh Khuallian chhawna hnam puanzar chibai buk turin an intlar thung dawn a, Independence Day lawmna hun hi mipuite tana thlir theih turin Cable TV pahnih CCN leh LCN ah te Live Telecast hmanga chhuah tum a ni.

Meeting-ah hian Sawrkar department hrang hrangte hna chanpual siamfel nghal niin, Independence Day urhsun taka lawm anih theih nan mahni chanvo theuh hneh taka hlen turin meeting chuan mawhphurhna latu zawng zawngte a ngen a. Kumin hian Independence Day puala infiamna huaihawt thinte, department hrang hrang atanga lawmna tur sum thawh thin leh sawmbikte puala thingpui ruai buatsaih thinte chu a awm dawn lo a ni.

Thukhawm chuan kumin Independence Day lawmna hunah hian Covid-19 hrileng ven leh beihletna kawnga tlawmngaia tha thawhtu hrang hrangte chu ngaihpawimawh zual bik nise tiin, he huna tel tur hian sawmna hranpa peka an hnathawh that avanga lawmthu sawina leh chawimawina thuziak hlan nise tih a ni a, hemi buaipui tur hian Addl. DC Pu Mark Lalthanliana kaihhruai Committee din a ni.

Kumin Champhaia Independence Day lawmna hun hi Mizoram sawrkara Minister of State Pu T.J. Lalnuntluanga, Law & Judicial, Parliamentary Affairs, Environment Forest & Climate Change leh Transport Department changtu Minister chuan khuallian niin a rawn hmanpui dawn a. Independence Day Celebration Committee chuan Independence Day chu India ram ni pawimawh berte zinga mi anih avangin Official leh sawm bikte chu he hun hi ngaipawimawha tel theuh turin a sawm a ni.