No.3487/2020-2020

Vawiin khan I&PR Director Pi Lallianpuii hovin a pisaah July ni 11, 2019-a boral Pu Richard Lallawmzuala (Patea), Zoram Tlangau Editor ralna hun an hmang. Pu Richard Lallawmzuala ralna programme-ah hian a pa Pu Lalbiakthanga Pachuau, Mizoram Prominent Journalist leh Padma Awardee ni bawk leh a chhungte bakah MJA President Pu Zonunsanga Khiangte leh MJA hotu dangte an tel.

Pi Lallianpuii chuan Pu Richard Lallawmzuala a uizia sawiin I&PR Department chuan an chhungkua a tuarpui takzet a, a pa Pu Lalbiakthanga Pachuau leh amah Pu Richard Lallawmzuala te hian I&PR Department-ah hmun zau tak an luah reng a ni, a ti. Information Director chuan Mizoram Sawrkarin thuthar thehdarhtute a ngai pawimawh em em a, an dam loh nikhuaa inenkawlna tur leh an thiha ralna sum Mizoram Journalist Welfare Society kaltlangin a pe thin, tih a sawi a. Sawrkarin journalist-te a duhsakzia hriaa an mawhphurhna tha taka hlen zel tur leh mipui tana tangkai tur sawrkar hmalakna uar taka puangzar chhunzawm zel turin a chah a ni.

Pu Richard Lallawmzuala chhungte hnenah hian ralna sum (ex-gratia) cheng nuai khat bakah a damloh chhunga a inenkawlna senso phuhruk nan cheng nuai khat, a vaiin cheng nuai hnih chu Mizoram Journalist Welfare Society kaltlangin Mizoram Sawrkarin a hlan a ni.