2824/2025-2026

Aizawl, 8th January, 2025 : Nimin khan Higher & Technical Education Minister Dr Vanlalthlana chu a pisa-ah Mizoram Presbyterian Kohhran hruaitute nen an inkawm a, Sikulpuikawna Govt. Aizawl College building inhlan chungchang an sawiho.

Meeting hian building inhlan fel dan tur chungchanga hma lo la tur leh agreement duangtu tur Drafting Committee a din a. Higher & Technical Education Director chu Convenor atana ruat niin department aṭang hian committee member atan Under Secretary leh Govt. Aizawl College Principal ruat an ni a, Mizoram Presbyterian Kohhran aṭangin Rev. Dr Rosiamliana Tochhawng, Executive Secretary (i/c Education) leh Synod Secretary (Jr) Upa C. Lalmuankima te chu ruat an ni bawk.

Mizoram Sawrkar leh Mizoram Presbyterian Kohhran inremna angin kum 2019 khan Sikulpuikawna Govt. Aizawl College dinna ram hi Mizoram Presbyterian Kohhran kutah hlan a lo a ni tawh a. Govt. Boys Primary School leh Govt. Boys Middle School, Sikulpuikawn chu school building leh a ram nen Mizoram Presbyterian Kohhran kuta hlan niin Govt. Aizawl College building chu hemi ram hian a huam tel a ni.

Govt. Aizawl College building Mizoram Presbyterian Kohhran hnena hlan fel vat a nih theih nan hian hun tiam siam niin a hma thei ang bera sawiho leh a, sawrkar leh kohhrana thuneitu sang zawk hnena thlen vat ni se tih a ni.

Meeting-ah hian Higher & Technical Education Department official-te bakah Mizoram Presbyterian Kohhran ai awhin Rev. VL Luaia Hranleh, Rev. Dr Rosiamliana Tochhawng leh Upa C. Lalmuankima te an tel a ni.