2825/2025-2026

Kolasib: 8th January, 2026: Vawiin chawhma dar 11:00 khan DC Conference Hall, Kolasib-ah kum 2026 Republic Day, Kolasib District chhunga hman dan tur relin thutkhawmna neih a ni a. He hun hi Kolasib Bawrhsap, Pu Robert C. Lalhmangaiha chuan a kaihruai a ni.

Thutkhawmna kaihruaitu, Bawrhsap Pu Robert C. Lalhmangaiha chuan kalkhawmte lawmna thu sawiin Kumthar Chibai a buk a. India ramin zalenna a neih hnua ram rorelna kawnga pawimawh tak, Danpui (Constitution) a neihna ni hriatrengna hun 'Republic Day' chu India mipuite tan ni chhinchhiahtlak tak a nih thu tarlangin, he huna kalkhawmte chu Republic Day pawimawhna hre reng turin a chah a ni.

Vawiin thutkhawmnaah hian kum danga Republic Day lo hman tawh thin dan te thlirletna neih a ni a, chumi hnuah kumin Kolasib-a Republic Day hman dan tur chipchiar taka sawiho nghal a ni. Kumin 2026 Republic Day lawmna pui ber hi Kolasib Sports Stadium, Project Veng-ah neih nise tih rel a ni a, zing dar 9:00-ah Programme tanin Kolasib Bawrhsap Pu Robert C. Lalhmangaiha chu Khuallian (Chief Guest) a ni ang.

Republic Day lawmna atan hian Kolasib khaw chhunga Sawrkar Department hrang hrangte mawhphurhna tur ruahmanna siam a ni a. Hnam Puanzar (National Flag) pawhpharh leh Hnam Hla (National Anthem) rem a ni dawn a; hei bakah hian Kolasib District-a Sawrkar Department hrang hrangte hmalakna hmuh theih tura pholanna hun hman nise tih a ni bawk. Republic Day chu India ram ni pawimawh tak a nih ang ngeiin, urhsun leh ropui taka hman turin ruahmanna siam a ni.

Vawiin thutkhawmna ah hian Kolasib District Head of Office te, NGO hruaitute, Village Council aiawhte leh Chanchinbu mi (Media persons) te an tel a ni.