2826/2025-2026

Dated Aizawl: the 08 January 2026 : Vawiin khan IPRP&S Department changtu Minister Pu B. Lalchhanzova chuan I&PR Auditorium-ah kum 2026 atana Mizoram Journalist Association (MJA) member-te inhlan tharna hun chu khuallian niin a hmanpui.

He hunah hian khuallian IPRP&S Department Minister Pu B. lalchhanzova chuan thusawiin, MJA member-te inhlan tharna hun a hmanpui thei chu lawmawm a tih thu a sawi a. MJA member-te chu sawrkar khalh ngil kawnga hna pawimawh tak, zalen taka thawktu an ni tih inhre reng tura chahin, kalphung ngelnghet leh rintlak tak an kalpui chu vawng nung zel turin a chah a. Mipuite leh sawrkar thlunzawmtu pawimawh tak an ni tih inhre reng tura fuihin, mipuite hnena thudik leh rin tlak chauh hriattir kawngah te, sawrkar hmel an tar lan dan thuahte pawh sawrkar chu thawhpui hram hram tur tein a sawm a. Sawrkar pawhin MJA member-te hmasawnna tur leh an than zelna turin theihtawpa hmalakpui a inhuam thu a sawi bawk a ni.

He hunah hian IPRP&S Secretary Pi Betsy Zothanpari Sailo pawhin thusawiin, khawtlang tana MJA member-te pawimawhzia a sawi a. MJA President Pu C. Lalrambuatsaiha pawhin, MJA leh Sawrkar thawhhona tha tak chu lawmawm a tih thu sawiin, MJA member-te chuan sawrkar leh mipuite tan theihtawp chhuaha ram hmasawnna atana thawh chu an thupui ber a nih thu a sawi bawk a ni.

 Vawiina MJA member-te inhlan tharna hun hi I&PR Director Pi K. Vanlalsangi chuan kaihruaiin  kalkhawmte lawmna thu a sawi a. MJA member thahnem tak bakah, IPR&PS  Department hotute leh mi pawimawh dangte an tel bawk a ni.