Higher & Technical Education Minister Pu R. Romawia chuan Mizoram quota-a Technical course zir tur thlanna chungchang hetiang hian a sawi: 

Kum 2014 a Mizoram Sorkar leh MZP inbiakna angin, Mizoram quota-a Technical courses zir tur thlanna-ah ram leilung fa dik tak ten Mizoram quota an luah ngei theih nan Mizoram sorkar chuan The Mizoram (Selection for Higher Technical Courses) Rules 1999 chu kum 2015 khan a siamtha a. Chu dan siamthat chu ram leilung fate him zawk nan ennawn leh niin 20^th April, 2016 khan notification tihchhuah leh a ni a. Kum 1999 Rules-in Category-I a 'Indigenous' a tih chu 'Zo-ethnic people of the state of Mizoram' ti a thlak a ni a. Category-II hnuaiah 'children of non-Zo ethnic people of the state of Mizoram' tih dah tel a ni bawk a ni. 

Amaherawhchu he dan siamthar hi mi thenkhatin an khin avangin High Court in hman theih rih loh turin a dang (stay) a. Hetianga High Court-in dan thar hman a phal tak loh avangin Rules hlui chu hman a lo ngai leh ta a. 

Chuvangin 2016 Rules-a Category-I hnuaia Indigenous (Zo-ethnic people)-te chauh an luh theih nana sorkarin dan a siamthar chu hman theih nilo mah se, kumin 2017-a Mizoram quota-a technical courses zir tur thlanna neih mekah hian Mizoram Sorkar chuan category-I hi ram neitu Zofate kutah chauh a dah dawn a ni. 

Kum dang anglo taka sorkar laipuiin All India level a Entrance exam - NEET (National Eligibility cum Entrance Test) a buatsaih tak avangin, Mizoram chhunga thalai leh zirlaite hi Quota-ah chauh innghat lova, general atanga tling thei tur khawpa taima lehzuala zirna ngai pawimawh turin Mizo zirlaite ka chah a. Hun lokal lehzel turah Mizoram quota hnawh khahna turin sorkar chuan ram leilung fate himna a ngai pawimawh ber zel dawn a ni.