Kar hmasa ningani (20.07.2017) khan H&TE changtu Parliamentary Secretary Pu H. Zothangliana chuan cheng nuai sawmpali (14 lakh) senga sak Sangau Circle Horticulture office building thar chu a hawng a, chhungkaw 26 te hnenah NEDP tanpuina a sem nghal bawk. 

Sangau-III community hall-a office thar hawnna inkhawm buatsaihah Pu H. Zothangliana chuan Sangau Circle Horticulture office building thar tha tak hawn a ni thei ta chu lawmawm a tih thu leh he lai bial mipuite'n hlawk zawka thei leh thlai an thar chhuah theih nana puitu tangkai tak a nih a beisei thu a sawi a. LADC sawrkar tharah mipuite'n hmasawnna nasa zawk an neih mek zel thu sawiin, Niti Ayog chungchangah LADC sawrkarin proposal tha tak a siam chu state sawrkarin a pawm tawh thu a sawi a. Mipuite'n council budget tam zawk an chhawr tangkai theih nan LADC sawrkar chuan chak takin hma a la mek a ni, a ti. 

Khual zahawm LADC CEM Pu T. Zakunga pawhin ram hmasawnna dik nei  tur chuan mipuite'n ?anrualna ?ha zawk nei a, lungrual taka ke pen a tul a ni, a ti bawk. 

Inkhawm kaihruaitu Lawngtlai Divisional Horticulture Officer Pu L. Lalhmingmawia Pachuau chuan circle office building thar hawn theiha a awm ta chu Sangau khaw mipuite bakah Mizoram tan hmasawnna bung thar a nih thu a sawi a. Office hawn thar chu mipuite'n a hma aia nasa zawka hmang tangkai turin a sawm nghal a ni. 

He hunah hian Parliamentary Secretary Pu H. Zothangliana leh LADC CEM Pu T. Zakunga te chuan Horticulture Department hnuaia NEDP tanpuina dawngtu Bualpui 'NG' leh Lungzarhtum khuaa chhungkaw 26 te hnenah tanpuina Rs 49,950 theuh, a zavaiin Rs 12,98,700 an sem nghal bawk. 

Sangau Circle Horticulture office building thar hi a dung fit 28 leh a vang fit 21 niin, a pumpui zau zawng hi square fit 612 a ni a. Office hawnnaah hian LADC-a EM leh MDC te bakah, sawrkar officer eng emaw zat an tel bawk.