Vawiin khan Lunglei Govt. College-in kum 50 a tlin ‘Golden Jubilee’ lawmna chu Saikuti Hall, Venglai-ah neih a ni a, Higher & Technical Education Minister Pu R.Romawia chu Khuallian niin Jubilee lawmna inkhawm hi a hmanpui a ni.

Lunglei Govt. College Golden Jubilee lawmna inkhawm Session-I Prof.C.Zairemthanga kaihhruaiah Khuallian Pu R. Romawia chuan he College-a zirlai hlui a nih thu te, Students’ Union hmasa bera General Secretary a nih thin thute sawiin Golden Jubilee lawmna chhim tura kalkhawm zawng zawngte Jubilee chibai bukin duhsakna a hlan a. Ram hmasawnna atana sum leh pai tihpun tluka pawimawh chu ramchhunga cheng mihringte tihhmasawn (human resource development) a ni a, chumi atan chuan zirna (education) hi a pawimawh ber a ni, a ti. Zirna kalpui a nih dan pawh thlak hret hret a tul a tih thu sawiin H&TE Minister chuan Degree Course pangngai rualin eizawnna lam zawnga zirna (vocational studies) pawh chak zawka kalpui a hun tawh a ni, a ti a; zirlaiten College an kal paha eizawnna atana tlak tur lam beauty culture, food processing, masonry angte pawh zir tel thei se, an hlawkpui ngei a rin thu a sawi bawk. Sorkar Laipui duhdan angin Mizoram District 8-ah Polytechnic din theih nan chak takin hmalak mek a nih thu tarlangin Pu R.Romawia chuan heng zirna inah te hian skill development lam pawh chak zawka kalpui a ni ang, a ti. Thalai lungawi lo an tam chuan ram kaihhruai leh enkawl pawh a ti harsa thin a, chuvangin kan thalaiten anmahni kut leh kea an din theih nan leh eizawnna ngel nghet an neih theih nan chherchho a tul tak zet a ni, a ti. Hnam taima hi an rethei ngai lova, chuvangin Mizote pawhin ‘kutdawh rilru’ kalsana 'rinawmna, taimakna leh tumruhna' nen hmasawnna i um zel zawk ang u, a ti. Khuallian H&TE Minister Pu R.Romawia chuan Lunglei Govt. College Golden Jubilee Souvenir a tlangzarh nghal a, College Jubilee lawmpui nan Rs. 40,000/- a hlan bawk a ni.

Lunglei Govt. College Principal Prof.R.Lalrosanga pawhin thusawiin an College dinhmun leh hmachhawp hrang hrang a tarlang a. Lunglei Govt. College-in Department 14 a nei zinga 6 chu Science Department a nih thu te, Certificate Course in Computer Application (6 mths) zirna bakah IGNOU Study Centre atan hman a ni mek bawk tih a sawi a. Chhimlama College dang zawng zawngte chu Lunglei College behchhana dingchhuak an nih thu a sawi bawk. Lunglei Govt.College hnuaia thawk zirtirtu 61 an awm mek a; Department 14 (Arts & Science)-a zirlai belhkhawm zat chu 807 a ni a, Certificate Course in CA hi mi 124-in an zir zo tawh bawk a ni.

Vawiin Lunglei Govt. College Golden Jubilee lawmnaah hian he College din a nih theih nan leh a din tirh atanga College hmasawn zelna tura tha leh zung sengtu College Principal, zirtirtu leh zirlai hlui bakah Lunglei khawchhunga College leh Zirna in dangte, kohhran leh tlawmngai pawl aiawh engemawzat an tel a. College Board hmasa bera Member ni thin Pu L.P.Thangzika, Ex-MLA pawhin thusawiin Jubilee duhsakna a hlan a ni. Jubilee lawmnaah hian College zirlai ten lam leh zai leh ennawm dang hrang hrang an entir bawk.

Vawiin tlai vek khan Lunglei Govt. College Golden Jubilee Monument chu Khuallian H&TE Minister Pu R.Romawia’n College Campus-ah a hawng a, Jubilee ruai kilho nghal a ni a.

Lunglei Govt. College Golden Jubilee Monument “Water Fountain ” hi Ex Deputy Speaker leh College Board hmasa ber member ni thin Pu L.P Thangzika’n Rs. 1,00,000/- a bul tum sak a siam a ni.