Vawiin khan Mizoram puma Local Administration Deparment (LAD) a thawktute chuan an Minister Pu P.C. Lalthanliana hovin I&PR Auditorium ah an inhmukhawm a, infuihtharna hun an hmang.
Minister Pu P.C. Lalthanliana chuan LAD kaltlanga mipui rawng an bawlhona kawngah hma an sawn zel theih nan tan tlan lehzual a pawimawh a ni, a ti. Field staff te chu a tak taka hnathawktu, deparment hmalakna duanchhuah te a taka kengkawhtu an nih hria a taima lehzual turin a fuih a. Sorkar hnathawkte hian mahni service leh mimal hamthatna chauh ngaihven lova ram mipui tan eng thil tha nge an lo tih ve tawh tih an ngaihtuah zawk tur a ni tiin sorkar hna an thawhnaah sorkar atanga sum leh pai, entitlement dawn tur zawng zawng mil khera hna thawh an tum chuan hna tak tak an thawk thei lovang, a ti a. Sorkar kaltlanga mipui rawngbawl hna kan thawh chhungin ram tan eng thil tha enge kan hnutchhiah tih hi kan inenfiahna tur a ni, a ti.
LAD a thawktute chuan Administration Department an ni tih hre thar leh turin a chah a. Hun kaltawha mawhphurhna tam tak an chelh thin kha khawvel hmasawn zelin a hrinchhuah sorkar inrelbawl dan inherdanglam avangin tihdanglam a lo tul ta, Minister chuan a ti a. Hmana tih ngai loh tuna tih tul leh hmana tih thin tih tul tawh lo te hi khawvel danglam zelin a her chhuahpui a ni a, department hnathawh dan pawh a ngai reng theilo. Department upa ber te zinga mi LAD hi mipui thlan tlin Village Council enkawltu an nih avangin a pawimawhna erawh engtik lai mahin a tlahniam tak tak theilo a ni, LAD Minister chuan a ti.
Pu P.C. Lalthanliana chuan VC inthlan a hnaih tawh angin tun dinhmunah khaw tam takin Village Council thar an dil a, heng dilna te hi uluk taka ngaihtuahin sorkarin Village Council thar a din thin a. Hemi kawngah hian chibing emaw hnam bil emaw angin VC hi pek a ni ngai lova, khua in an mamawh dan a zir zel zawka pek thin a ni tih mipui ten hria se a duh thu a sawi lang bawk. LAD hi Mizoram sorkar hnuaia department upa berte zinga mi a ni a, Village Council kaihhruaina leh inenkawlna chungchangah mawhphurhna sang tak neiin VC area chhungah hmasawnna hna minor works a thawk thin a. He department hian park siam lamah hma nasa tak la in tunah hian park pasarih hawn tawh a ni a, Vairengte, Hlimen leh Mamit ah te park siam thar tum mek a ni bawk. Kum tam tak chhung loan an lo pek thin chu tihtawp a ni dawn ta a, amaherawhchu LAD Minister tan lakna avangin sorkar hnathawkte tan HUDCO loan lak dan tur ngaihtuah mek a ni bawk.
Autonomous District Council tiam lovin tunah hian VC 508 a awm a, Lunglei ah 138, Champha-iah 105, Aizawlah 91, Mamitah 85, Kolasib ah 45 leh Serchhipah 44 a awm mek a. CADC huamchhungah VC 83, MADC ah VC 93, LADC huamchhungah 100 awmin heng Autonomous District Council ah hian Village Council 276 an awm a ni. Village Council member neih theih zat chu In 200 leh a aia tlem awmnaah member 3, In 201 atanga 500 ah member 5, In 501 atanga 1000 ah member 7, In 1000 chunglamah member 9 an nei thei a. Tunah hian VCP in lawmmanah cheng 1000 an dawng a, Vice President in cheng 800, VC member leh secretary in cheng 600, tlangauvin cheng 450 lawmman an dawng a ni.
Zoram Energy Development Agency (ZEDA) te nena thawk hovin LAD chuan Solar Street Light project a kalpui dawn a. Finance Commission Grant fund hmangin Mizoram thingtlang khua zawng zawng hi solar street light hmanga kah en vek tum a ni.
