Vawiin chawhma khan Aizawl DC Conference Hall-ah HIMNA-MADAT Project hnuaia hmalak tawhna chu Aizawl DC Dr. A. Muthamma hovin sub-committee member hrang hrangten thlirletin hun an hmang a; Analytical Study Report, Draft Module on Project HIMNA-MADAT, Awareness Video leh theme song enchhinna bakah Mobile Campaign team-te hmalakna sawi hona hun an hmanga, sawrkar kum thara hmalak zel dan tur an sawi bawk.
Aizawl DC Dr A. Muthamma chuan HIMNA-MADAT chu Mizoram thangtharte ruihtheih thil laka an fihlim theihna kawng a hmanraw pawimawh tak a nih ngei a beisei thu a sawi a; analytical report atanga zirlai naupang tam tak ten ruihhlo thatlohna leh ruihhlo do kawnga zirtirna an dawng tlem anga lang chu pawi a tih thu sawiin, HIMNA-MADAT hmangin zirlai naupangte thleng thei tur ruihhlo dona inzirtirna tha Mizoramin kan mamawh zia a lang chiang hle a ni, a ti.
He hunah hian Research and Documentation sub-committee buatsaih Analytical study report thlirho a ni a, Module Preparation team leader Pi Zochhuani, Senior Lecturer, DIET in he report behchhana Study Module (Activity textbook) an buatsaih chu committee hmaah a pharh a, Module hi peihfel a nih hunah school hrang hranga zirtur a ruahman a ni ang. He project hnuaia naupangte awareness atan documentary film “Duhthlanna” tih anlo siam tawh a, short film dang buatsaih leh tura hmalakna te Dr. Robert L. Khawlhring, State Nodal Officer (Mental Health) chuan a sawi bawk. Dr. Lalthlengliani, State Nodal Officer (RBSK & RKSK) chuan Mobile Campaign report pein Aizawl district school hrang hrang 50 thlan chhuah zinga school 41 te hnenah HIMNA-MADAT kaltlangin “Basics of drugs, alcohol & tobbacco control” inzirtirna hun hman a nih tawh thu a sawi bawk.
“Project Himna – MADAT (Mizoram Against Drugs, Alcohol and Tobacco)” hi June ni 21, 2017 khan New Economic Development Policy (NEDP) hnuaia Sorkarin ruihtheihthil laka thalaite an fihlim theihna tura ruahmanna a duan a ni a.He Project hi Aizawl DC Office kaltlanga Pilot Project siam niin, Upper Primary School zirlai chin chunglam a huam a ni. Project HIMNA – MADAT hi Aizawl District chhunga school thlanbikte ah kalpui niin, mipui cheng zat tam avang leh ruihtheihthil ti an tam avangin he project enchhin nan Aizawl District chu thlan a ni a. Health & Family Welfare, Education leh Social Welfare Department te bakah, Anti-Tobacco leh Anti-Drug Abuse lama tlawmngai pawlte nen tanghovin Aizawl DC kaihhruaina hnuaia hmalak a ni a. A project hmalakna zingah hian naupang zingah ruihtheihthil avanga an chunga thil thalo thleng thei hrang hrang inhrilhhriatna neih te, school-a Anti-Tobacco/Anti-Drug Abuse Club din te, Art competition buatsaih te, pamphlet, poster, sticker leh complaint board siam te, zirna in bulhnai a vaihhlo leh ruihtheihthil eng chi mah zawrh phallo tura hmalak te, Public Education campaign buatsaihte leh zirlaite hriatna tizau tura hospital tlawh programme siamte bakah zirlai nu leh pate zingah leh zirtirtute zinga vaihhlo nghei uar tura hmalak te a tel a ni.
