Nizan khan Siamliana Hall, Mamit-ah Mamit Election Branch under Systematic Voters Education and Electoral Participation (SVEEP) huaihawtin Mamit Branch MHIP member te tan Workshop On Clean Election chungchang zirhona neih a ni a. Pu Jacob Lalawmpuia, Addl D.C/ERO Mamit chuan a hmanpui. 

He hun hmanpuitu Pu Jacob Lalawmpuia Addl D.C chuan kan ram chu inthlang ram kan nih angin kan hmalawkah hian kan ram hruaitu turte thlanna kan hmachhawn leh dawn a, inthlanna felfai leh thianghlim kan neihna turin kan inbuatsaih a pawimawh hle  a ni a ti. Mizoram chu Kristian ram kan nih angin kan thiltihna kawng hrang hrangah kan danglamna kan lantir tur a ni tiin, kan ram hruaitu kan thlandanah thianghlim tawk lo leh fel tawklo a awm a nih chuan a thlangtu mipuite kan inenfiah a ngai a, engemaw therlo beisei avanga kan chanvo leh kan zahawmna kan tichhia a nih chuan ram hruaitu tha nei tlak kan ni em tih kan inzawh nawn fo a tul thu a sawi bawk. 

Addl D.C chuan inthlanna thianghlim leh felfai kan neihna tura pawimawh tak mai chu chhungkhata nu berte kan ni a ti a, kan in chhung, kan pasal fanaute kawngdik kawhhmuh leh zirtir kawngah te tih theih thui tak kan nei a, India khua leh tui kan nihna kan chanvo hlu tak kan vote hmanga rilru thianghlim tak pu a, kan duhzawng leh midik tak thlanga inthlanna hmaachhawn turin MHIP member-te a sawm a, midangte zirtir chhawngtu ni thei tura an pawimawhna inhrethar turin a chah bawk a ni. 

Pu M.H James Election Officer Mamit District chuan Inthlanna thianghlim leh nute mawhphurhna tih hmangin thusawina a nei a, inthlanna thianghlim leh felfai awm theih nan Election Commission of India chuan nasa takin hma a lak thu a sawi bawk. Kalkhawmte atangin inthlanna thianghlim leh felfai nei thei tura sawihona hun tha tak hman a nih bakah sawm bikte atanga thusawi ngaihthlak a ni bawk. 

He Workshop hi Pi F. Chhungliani, Adviser, MHIP Mamit Branch chuan a kaihruai a. Pi Lalzikpuii SDC/AERO, Mamit chuan lawmthu sawiin hun a khar a ni. Mamit Branch huam chhunga MHIP members thahnem tak an tel a ni.